Creciente Rencor Contra Belasting?

“Maske mi traha mata curpa, gran parti di mi entrada ta ser kita for di mi.”

—Proverbio di Babilonia, rond di aña 2300 prome cu nos era.

“Den e mundo aki, e unico dos cosnan sigur ta morto y belasting.”

—Estadista Mericano Benjamin Franklin, 1789.

REUBEN ta traha como bendedo. Tur aña casi un tercera parti di su salario cu el a traha duro p’e, ta disparce den forma di belasting. E ta keha: “Mi no ta mira kico nan ta haci cu tur e placa aki. Cu e tantisimo medidanan di gobierno pa economisa, nos ta ricibiendo menos servicio cu nunca.”

Sinembargo, sea cu nos gusta of laga, belasting ta un parti di bida. E escritor Charles Adams a bisa: “For di principio di civilisacion, gobiernonan ta cobrando belasting riba entrada den hopi manera.” Hopi bes belasting a lanta rencor den pueblo y tawatin biaha cu el a inicia revolucion. E Britaniconan di antiguo a lucha contra e Romanonan, bisando: “Ta miho nan a mata nos, cu laga nos sigui biba cu belasting riba nos cabes!” Na Francia, odio contra gabelle, un impuesto riba salu, a contribui na e inicio di e Revolucion Frances, durante cua nan a decapita cobradonan di belasting. Revolucion contra medidanan di belasting a hunga un rol tambe den e guera pa independencia cu Merca a bringa contra Inglatera.

No ta un sorpresa anto cu rencor contra belasting ta sigui herbe te cu awe. Expertonan ta bisa cu den paisnan den desaroyo sistemanan di belasting hopi bes ta “ineficiente” y “inhusto.” Segun un investigado, tin un pais Africano pober cu tawatin “mas cu 300 lei local di belasting, y tawata imposibel pa administra nan asta cu e personal di mas capasita. Sea no tin of no ta aplica bon metodonan di cobra y supervisa e belasting, . . . creando oportunidadnan pa haci mal uzo di dje.” BBC News a informa cu den un pais Asiatico, “funcionarionan local a impone decenas di . . . belasting ilegal—for di belasting pa cultiva bacoba te na belasting pa mata porco—sea pa aumenta e entrada local di gobierno of pa yena nan mes saco.”

E diferencia grandi cu tin entre rico y pober ta intensifica e rencor contra belasting. Segun e publicacion di Nacionnan Uni Africa Recovery: “Un di e tantisimo diferencianan economico cu tin entre paisnan desaroya y esnan den desaroyo ta cu paisnan desaroya ta duna subsidio na cunukero mientras cu paisnan den desaroyo ta impone belasting riba cunukero. . . . Investigacionnan di Banco Mundial ta indica cu posiblemente subsidionan na cunukeronan Mericano so caba ta pone cu e entrada anual cu West Africa ta haya di su exportacion di catuna ta ser reduci cu $250 [miyon] pa aña.” Pesei cunukeronan den paisnan den desaroyo kisas no ta gusta ora cu nan gobierno cobra belasting riba nan entrada cu ya caba ta tiki. Un cunukero den un pais Asiatico a bisa: “Ki ora cu [funcionarionan di gobierno] a bin akinan nos tawata sa cu sin duda nan ta bin pa pidi placa.”

Na Sur Africa nos a mira e mesun rencor ei resientemente ora cu gobierno a impone un grondbelasting pa cunukero. E cunukeronan a menasa di bai corte. Segun un bosero di e cunukeronan, e belasting ei “lo pone cunukeronan bai falliet y lo causa mas desempleo entre trahado di cunucu.” Tin biaha, rencor contra cierto belasting ainda ta resulta den violencia. BBC News a informa: “Dos cunukero [Asiatico] a ser mata aña pasa ora cu polis a invadi un pueblito caminda campesinonan tawata protesta contra belasting mucho halto.”

Pero no ta hende pober so ta carga un rencor contra belasting. Un encuesta na Sur Africa a revela cu hopi pagado di belasting bon para, “no ta dispuesto pa paga mas belasting—asta si esaki a nifica cu gobierno lo no por mehora e servicionan cu ta importante pa nan.” Personanan mundialmente famoso riba tereno di musica, pelicula, deporte y politica tawata den noticia di prome plano debi cu nan a haci cosnan ilegal pa nan no paga belasting. E buki The Decline (and Fall?) of the Income Tax (E Decadencia [y Colapso?] di Belasting Riba Entrada) a comenta: “Lamentablemente, nos funcionarionan gubernamental di mas halto, nos presidentenan, tampoco no tawata ehempelnan perfecto pa inspira ciudadanonan comun y coriente pa obedece lei di belasting.”

Podise bo tambe ta sinti cu tin mucho hopi belasting y cu nan ta inhusto y aplastante. Con anto bo tin cu mira pagamento di belasting? E ta sirbi pa algo realmente util? Dicon reglanan di belasting hopi bes ta asina complica y aparentemente inhusto? E siguiente articulonan ta analisa e preguntanan aki.

[Plachi na pagina 4]

Den paisnan den desaroyo hende pober kisas ta carga un parti inhusto di e peso di belasting

[Reconocemento]

Godo-Foto