Un Show di Lus Bibo bou di Awa

Un sambuyado cu tawata duik banda di un par di baranca su bista a cai riba un tipo di secat di 60 centimeter largo cu tawata drif den un split di baranca, casi perfectamente camufla den su fondo blou shinishi. Ora e sambuyado a yega mas serca, e secat a cambia di color y bira un cora briyante. Pero na momento cu e sambuyado a bek, e secat a bolbe haya su color original. Bo a yega di puntra bo mes con e molusconan (weekdier) asombroso aki ta logra e hazaña ei—algo cu otro tipo di secat tambe por haci?

Nan secreto ta sinta den nan cromatoforonan, esta, celnan di cuero cu ta contene pigment. Nervionan ta causa contraccionnan muscular cu ta regula tamaño di e celnan aki, locual ta pone e criatura cambia di color y crea diferente patronchi di color.

Ademas di controla color, hopi especie di secat ta produci asta nan mes lus. Nan ta haci esei mescos cu bichicandela. E capasidad aki pa emiti lus sin genera calor, algo cu hopi otro criatura di lama tambe tin—for di jellyfish te cabaron—ta wordo causa door di reaccionnan kimico complica den celnan cu yama fotosytnan of den organonan cu yama fotoforonan. Tambe e por wordo causa door di bacterianan cu ta lombra y cu ta biba riba e criaturanan aki y alabes depende di nan.

Den caso di reaccionnan kimico complica, e celnan y organonan cu ta emiti lus ta contene un substancia kimico cu yama luciferina, cu ta reacciona cu oxigeno ora tin un cierto enzim presente y ta saca un lus cu por lo general ta blou berde. E revista Scientific American ta bisa cu algun organo radiante “ta manera aparatonan complica cu tin lens pa enfoca, filter di color of un klep ahustabel cu ta sirbi como un switch di sende/paga. Secat cu tin tanto fotoforonan como cromatoforonan den nan cuero por controla tanto e color como e intensidad di lus produci.”

Criaturanan cu ta briya door di uza bacteria cu ta lombra ta acomoda e huespetnan chikito aki den organonan special di lus cu tin un suministro amplio di cuminda. E sanger ta hiba nutricion pa e microbionan, den un sentido, pagando asina e “resibo di lus.”

[Reconocemento pa Potret na pagina 31]

Potret chikito: Pa cortesia di Jeffrey Jeffords/www.divegallery.com

© David Nicholson/Lepus/Photo Researchers, Inc.