El A Siña Esei for di Spierta!

PERLA, un hobensita di ocho aña, ta den tweede klas na Veracruz, Mexico. Un dia su juffrouw a puntra ken sa con largo un bayena ta. Na prome instante ningun mucha no a contesta. E ora ei Perla a hisa man y a bisa: “Un bayena por bira 14 meter largo y pisa 16 ton.”

Sorprendi, e juffrouw a puntr’e: “Unda bo a siña esei?”

“For di e revista Spierta!”, Perla a contesta. “Si juffrouw kier mi por mustra juffrouw.” Normalmente Perla tin edicionnan resien di Spierta! den su tas di scol pa comparti cu otro hende. Pa casualidad e tawatin e edicion di 8 di september 2003 (na Spaño), cu tawatin e articulo “Nos Encuentro Memorabel cu Bayena Shinishi.”

Perla su juffrouw gustosamente a acepta un ehemplar di e revista. No solamente el a les’e sino cu e kier a keda cu ne tambe. Algun alumno tambe tawata kier un ehemplar, pues Perla a busca e revista pa nuebe di nan. Perla a haya hopi elogio di su juffrouw, y awor e ta hiba e revista Spierta! cada dos siman p’e.

Un poco despues di e experencia aki, Perla a asisti na un congreso di districto di Testigonan di Yehova. Prome cu Perla a bai, su juffrouw a bis’e cu lo e keda contento si e trece un regalo for di e congreso p’e. Pues Perla a hiba e buki Siña for di e Gran Maestro p’e, un buki cu a keda presenta e zomer ei.

Mas despues e juffrouw a bisa algun di su alumnonan: “Perla ta un bon ehempel, pasobra e no ta interesa solamente den su bukinan di scol, sino tambe ta studia otro informacion util y asta ta compartie cu nos.”