Loke Ta Forma un Menasa pa Nos Siguridad

“Ningun otro generacion tabatin e recursonan tecnologico, cientifico y financiero cu nos tin awe ... Pero kisas nos ta e prome generacion cu ta a punto di causa un colapso den e sistema” politico, economico y ambiental.—The Global Risks Report 2018, World Economic Forum.

DICON HOPI HENDE CU TA BON STUDIA TA PREOCUPA PA NOS FUTURO Y FUTURO DI NOS PLANETA? LAGA NOS TRATA ALGUN DI E PROBLEMANAN CU NOS TA ENFRENTA AWE.

• 

  CRIMEN RIBA INTERNET: E corant The Australian ta bisa: “Dia pa dia internet ta birando un luga mas peligroso. E ta un luga ideal caminda pedofiel, hende cu ta ter of bully, hende cu ta manda mensahe pa pone hende bay contra otro y hackers por sconde.” E corant ta sigui bisa: “Robo di identidad ta un di e crimennan cu ta aumentando rapidamente rond mundo ... Internet ta duna hende un chens pa desplega e cualidadnan di mas malo cu nan por tin, esta perversion y crueldad.”

• 

  DESIGUALDAD ECONOMICO: Segun un informe reciente di Oxfam Internacional, e ocho personanan mas rico na mundo tin mes hopi placa cu e 3,6 mil miyon hendenan mas pober na mundo. E informe ta sigui bisa: “Rond mundo e sistema economico ta inhusto pasobra e riconan ta bira mas rico a costo di esnan mas pober den comunidad, kendenan mayoria di biaha ta hende muher.” Tin hende ta preocupa cu e desigualdad aki por pone hende rebeldia.

• 

  GUERA Y PERSECUCION: Un informe di 2018 di e Departamento di Nacionnan Uni pa Refugiado ta bisa: “Nunca nos a yega di experencia un cantidad asina halto di refugiado.” Mas cu 68 miyon hende mester a bandona nan cas pa motibo di guera y persecucion. E informe ta bisa tambe: “Cada dos seconde, mas o menos 1 hende ta hay’e obliga di huy.”

• 

  CONTAMINACION: The Global Risks Report 2018 ta bisa cu “un gran cantidad di mata y bestia ta disparciendo rapidamente ... Contaminacion di aire y lama ta forma un menasa cada bes mas grandi pa salud di hende.” Ademas, e cantidad di insecto a baha drasticamente. Y como cu insecto ta polinisa mata, cientificonan ta pronostica un desaster ecologico. E rifnan di coral tambe ta den peliger. Cientificonan ta calcula cu durante e ultimo 30 añanan mas o menos mitar di e rifnan di nos planeta a muri.

Acaso nos por haci e cambionan necesario pa nos mundo por ta un luga mas safe? Tin hende ta pensa cu enseñanza ta e solucion. Si esey ta e caso, ki tipo di enseñanza? E siguiente articulonan lo contesta e preguntanan ey.