Dos Hende Muher cu Curashi

ORA cu e Israelitanan a haya nan mes den dificultad, nan tabata sclama na Jehova. Jehova tabata contesta nan dor di manda lidernan cu curashi pa yuda nan. Bijbel ta yama e lidernan ei hues. Josue tabata e prome hues, y algun hues despues di dje tabata yama Otoniel, Aod y Samgar. Pero dos di e hendenan cu a yuda Israel tabata hende muher, y nan nomber tabata Debora y Jael.

Debora tabata un profetisa. Jehova tabata dun’e informacion tocante futuro, y despues e tabata bisa e pueblo loke Jehova a bisa. Debora tabata hues tambe. E tabata sinta bou di un cierto palma den e region di sero, y hende tabata acudi na dje pa yudansa cu nan problemanan.

Na e tempo ei Jabin tabata Rei di Canaan. E tabatin 900 garoshi di guera. Jabin su ehersito tabata asina fuerte cu hopi Israelita a ser forsa pa bira su sirbidor. E hefe di ehersito di Rei Jabin a ser yama Sisara.

Un dia Debora a manda yama Hues Barak y a bis’e: ‘Jehova a bisa: “Tuma 10.000 homber y hiba nan Sero Tabor. Lo mi trece Sisara eicerca bo. Y lo mi duna bo victoria riba dje y su ehersito.”’

Barak a bisa Debora: ‘Mi ta bai basta bo ta bai cu mi.’ Debora a bai cu ne, pero el a bisa Barak: ‘Lo bo no haya e honor di e victoria, pasobra Jehova lo entrega Sisara den man di un hende muher.’ Y esei ta loke a sosode.

Barak a baha for di Sero Tabor pa contra cu e soldanan di Sisara. Diripiente Jehova a manda un inundacion, y hopi di e soldanan enemigo a hoga. Pero Sisara a baha for di su garoshi di guera y a hui.

Despues di poco tempo Sisara a yega na e tent di Jael. Jael a invit’e pa drenta y a dun’e lechi pa bebe. Esei a dun’e soño, y pronto el a bai un soño profundo. E ora ei Jael a cohe un staca di tent y a clab’e den cabes di e homber malbado. Despues, ora Barak a yega, Jael a mustr’e Sisara morto! Asina bo por mira cu e palabra di Debora a cumpli.

Finalmente nan a mata Jabin tambe, y e Israelitanan tabatin pas atrobe pa un tempo.