E Promesa di Jefte

BO A yega di haci un promesa anto despues a haya cu ta dificil pa cumpli cu ne? E homber riba e plachi aki a pasa den esei, y p’esei e ta asina tristo. E homber ta e hues balente di Israel cu yama Jefte.

Jefte a biba na un tempo ora cu e Israelitanan no tabata adora Jehova mas. Nan tabata haci loke ta malo atrobe. P’esei Jehova a laga hende di Amon haci nan daño. Dor di esei e Israelitanan a sclama na Jehova bisando: ‘Nos a peca contra bo. Salba nos, por fabor!’

E pueblo a sinti duele di e cosnan malo cu nan a haci. Nan a mustra cu nan a sinti duele dor di bolbe adora Jehova. Anto p’esei Jehova a yuda nan atrobe.

E pueblo a scohe Jefte pa bringa contra e Amonitanan malbado. Jefte a desea masha pa Jehova yud’e den e bataya. P’esei el a priminti Jehova: ‘Si bo duna mi victoria riba e Amonitanan, e prome persona cu sali for di mi cas pa contra mi ora mi bolbe for di e victoria, lo mi duna na bo.’

Jehova a scucha e promesa di Jefte, y a yud’e gana e victoria. Ora cu Jefte a yega cas bek, bo sa ken tabata e prome persona cu a sali pa bin contr’e? Esei tabata su yiu muher, su unico yiu. ‘Ai mi yiu!’ Jefte a sclama. ‘Ki un tristesa bo ta causa mi. Pero, mi a haci un promesa na Jehova, y mi no por nenga di cumpli cu ne.’

Ora e yiu muher di Jefte a tende di su promesa, e tambe a keda tristo na principio, pasobra esei a nifica cu e tabatin cu bandona su tata y su amiganan. Pero e lo a pasa e resto di su bida sirbiendo Jehova na su tabernakel na Silo. Pues el a bisa su tata: ‘Si bo a haci un promesa na Jehova, bo tin cu cumpli cu ne.’

Pues, e yiu muher di Jefte a bai Silo, y a pasa e resto di su bida sirbiendo Jehova na su tabernakel. Tur aña, e hende muhernan di Israel tabata bai bishit’e pa cuater dia, y nan tabata pasa e dianan contento hunto. E pueblo a stima e yiu muher di Jefte pasobra e tabata asina un bon sirbidor di Jehova.