Dios Ta Scohe David

BO POR mira kico a sosode? E mucha homber a scapa e lamchi for di e oso. E oso a bini y a cohe e lamchi bai cu ne pa com’e. Pero e mucha a core tras di e oso y a scapa e lamchi for di su boca. Y ora e oso a lanta para, e mucha a gara e oso y a dal e mata! Un otro biaha el a scapa un carne for di un leon. E ta un mucha cu hopi curashi, bo no ta haya? Bo sa ken e ta?

Esei ta e hoben David. E ta biba den e pueblo di Betlehem. Su welo tabata Obed, yiu di Ruth cu Boaz. Bo ta corda nan? Y tata di David ta Isai (Jese). David ta cuida e carnenan di su tata. David a nace 10 aña despues cu Jehova a scohe Saul pa ser rei.

E tempo a yega ora cu Jehova a bisa Samuel: ‘Cohe un tiki azeta special y bai na cas di Isai na Betlehem. Mi a scohe un yiu di dje pa ser rei.’ Ora Samuel a mira Eliab, e yiu mayo di Isai, el a pensa: ‘Esei siguramente ta esun cu Jehova a scohe.’ Pero Jehova a bis’e: ‘No wak con halto y nechi e ta. Mi no a scoh’e pa ser rei.’

P’esei Isai a yama su yiu Abinadab y a hib’e cerca Samuel. Pero Samuel a bisa: ‘No, Jehova no a scoh’e tampoco.’ Siguientemente, Isai a trece su yiu Sama. Samuel a bisa: ‘No, Jehova no a scoh’e tampoco.’ Isai a trece shete di su yiu hombernan cerca Samuel, pero Jehova no a scohe ningun di nan. Samuel a puntra: ‘Esei ta tur e yiu hombernan?’

Isai a bisa: ‘Tin e yiu mas chikito ainda. Pero e ta pafo ta cuida e carnenan.’ Ora nan a trece David paden, Samuel a mira cu e tabata un bunita mucha. Jehova a bisa: ‘Esaki ta esun. Basha azeta riba dje.’ Y esei ta loke Samuel a haci. Cu tempo, David lo a bira rei di Israel.