Sperando den Jerusalem

E HENDENAN ei ta siguidonan di Hesus. Nan a obedec’e y a keda den Jerusalem. Y mientras cu nan tur tabata spera hunto, un zonido duro a yena henter e cas. El a zona manera un biento fuerte. Anto lenga di candela a cuminsa aparece riba cabes di cada un di e discipelnan. Bo ta mira e candela riba cada un di nan? Kico esei a nifica?

Esei ta un milager! Hesus a yega bek den shelo cerca su Tata y el a drama spirito santo di Dios riba su siguidonan. Bo sa kico e spirito ei a pone nan haci? Nan tur a cuminsa papia den diferente idioma.

Hopi hende den Jerusalem a tende un zonido manera un biento fuerte y nan a bin pa mira ta kico a sosode. Algun tabata hende di otro nacion cu a bin pa e fiesta Israelita cu yama Pentecoste. Ki un sorpresa e bishitantenan ei a ricibi! Nan a tende e discipelnan papia den nan mes idioma tocante e cosnan maraviyoso cu Dios a haci.

E bishitantenan a bisa: ‘Tur e hendenan ei ta di Galilea. Anto con por ta cu nan por papia den diferente idioma di e paisnan di unda nos a bin?’

Awor Pedro a lanta y a splica nan. El a hisa su bos y a bisa e pueblo con Hesus a wordo mata, y cu Jehova a lant’e for di morto. Pedro a bisa: ‘Awor Hesus ta den shelo na man drechi di Dios y el a drama e spirito santo priminti. P’esei boso a mira y tende e milagernan aki.’

Wel, ora Pedro a bisa esei, hopi di e hendenan a sinti masha duele di loke nan a haci cu Hesus. Nan a puntra: ‘Kico nos mester haci?’ Pedro a bisa nan: ‘Boso tin cu cambia boso bida y batisa.’ P’esei riba e mesun dia ei rond di 3.000 hende a batisa y a bira siguido di Hesus.