Pablo na Roma

MIRA e cadena na Pablo su man, y tambe e solda Romano cu ta vigil’e. Pablo ta un prizonero na Roma. E ta sperando pa Cesar dicidi kico pa haci cu ne. Nan ta permiti Pablo ricibi bishita maske e ta prizonero.

Tres dia despues cu Pablo a yega Roma, el a manda rospondi pa algun lider Hudiu bin bishit’e. Como resultado, hopi Hudiu di Roma a bin. Pablo a predica na nan tocante Hesus y e reino di Dios. Algun Hudiu a kere y a bira cristian, pero otronan no a kere.

Tambe Pablo a predica na diferente solda cu tabatin e trabou di vigil’e. Durante e dos añanan cu nan a tene Pablo preso, el a predica na mas tanto hende posibel. Como resultado, asta e famia di Cesar a tende e bon nobo di e Reino, y algun di nan a bira cristian.

Pero ken ta e bishitante sinta na e mesa ta skirbi? Bo por rei ta ken? Si, esei ta Timoteo. Nan a sera Timoteo tambe dor cu e ta predica tocante e Reino, pero awor e ta liber atrobe. Y el a bishita Pablo pa yud’e. Bo sa kico Timoteo ta skirbiendo? Laga nos mira.

Bo ta corda e dos stadnan, Filipos y Efeso, den Relato 110? Pablo a yuda establece congregacion cristian den e dos stadnan ei. Awor, sera den prizon, Pablo ta skirbi carta na e cristiannan ei. E dos cartanan ta den Bijbel, y nan yama Efesionan y Filipensenan. Awor Pablo ta bisando Timoteo kico pa skirbi na nan amigonan cristian na Filipos.

E Filipensenan a trata Pablo cu masha bondad. Nan a manda un regalo p’e den prizon, y p’esei Pablo ta manda gradici nan. Epafrodito ta esun cu a trece e regalo. Pero el a bira hopi malo y casi a muri. Awor e ta bon atrobe y cla pa bai cas. E lo hiba e carta di Pablo y Timoteo ora e bai Filipos bek.

Den prizon Pablo a skirbi dos carta mas cu ta den Bijbel. El a dirigi un di e cartanan na e cristiannan di e stad Colosas. Bo sa con yama e carta ei? Colosensenan. E otro tabata un carta personal pa un amigo intimo yama Filemon cu tambe tabata biba na Colosas. E carta ta tocante Onesimo, sirbidor di Filemon.

Onesimo a hui di Filemon y a bai Roma. Di un manera of otro Onesimo a tende cu Pablo ta den prizon einan. El a bishita Pablo y Pablo a dun’e testimonio. Pronto Onesimo tambe a bira un cristian. Awor ta duel Onesimo cu el a hui. Bo sa kico Pablo a skirbi den e carta ei pa Filemon?

Pablo a pidi Filemon pordona Onesimo. Pablo a skirbi: ‘Mi ta manda Onesimo bek cerca bo. Pero awor e no ta bo sirbidor so. Tambe e ta un bon ruman cristian.’ Ora Onesimo a bolbe pa Colosas el a hiba e dos cartanan cu ne, un pa e cristiannan Colosense y e otro pa Filemon. Imagina bo con contento Filemon a keda pa tende cu su sirbidor a bira cristian.

Ora Pablo a skirbi e Filipensenan y Filemon, e tabatin noticia masha bon mes. Pablo a bisa e cristiannan Filipense: ‘Mi ta manda Timoteo cerca boso. Pero ami tambe lo bishita boso pronto.’ Y el a skirbi Filemon: ‘Prepara un luga pa mi keda cerca bo.’

Ora Pablo a haya su libertad el a bishita rumannan cristian na varios luga. Pero despues nan a hiba Pablo preso na Roma atrobe. E tabata sa cu e biaha aki si nan lo mat’e. P’esei el a skirbi Timoteo y pidie bin lihe. Pablo a skirbi: ‘Mi a keda fiel na Dios, y Dios lo recompensa mi.’ Poco aña despues Pablo a ser mata anto Jerusalem a ser destrui atrobe, pero e biaha aki dor di e Romanonan.

Pero tin mas cos den Bijbel. Jehova Dios a inspira apostel Juan pa skirbi e ultimo bukinan, incluso e buki Revelacion. E buki di Bijbel aki ta conta nos tocante futuro. Laga nos siña awor kico ta bin den futuro.