“Esaki Ta Mi Yiu”

ORA mucha haci cos bon, e hendenan cu ta cria nan ta keda contento. Ora un mucha mohe haci un cos bon, su tata ta sintie bon di por bisa hende: “Esaki ta mi yiu mohe.” Of, si un mucha homber haci un cos bon, un tata ta felis di por bisa: “Esaki ta mi yiu homber.”

Semper Hesus ta haci cos cu su Tata ta gusta. Pesei su Tata ta orguyoso di dje. Bo ta corda kico Hesus su Tata a haci un dia ora Hesus tawata hunto cu tres di su siguidonan?— Si, Dios a papia te for di shelo pa bisa nan: “Esaki ta mi Yiu stima, den kende mi tin goso.”—Mateo 17:5.

Semper Hesus ta gusta haci cos cu ta pone su Tata bira contento. Bo sa dicon? Pasobra e ta stima su Tata di berdad. Si un hende haci un cos djis pasobra e tin cu hacie, e cos ta parce dificil. Pero si e ta dispuesto, e cos ta bai mas facil. Bo sa kico kiermen ser dispuesto?— E kiermen cu bo mes tin gana di haci un cos.

For di prome cu Hesus a bin na tera, e tawata dispuesto di haci kico cu su Tata pidie, pasobra e ta stima su Tata, Yehova Dios. Hesus tawatin un bida maraviyoso den shelo serca su Tata. Pero Dios tawatin un trabou special pa Hesus. Pa Hesus por a haci e trabou ei, e mester a bai for di shelo. E mester a nace como baby riba tera. Hesus tawata dispuesto di haci esei, pasobra Yehova tawata kier pa e hacie.

Pa Hesus por a nace como baby na tera, e tawatin mester di un mama. Bo sa ken su mama tawata?— Su nomber tawata Maria. Yehova a manda su angel cu yama Gabriel for di shelo pa papia cu Maria. Gabriel a bisa Maria cu e ta bai haya un baby, un yiu homber. E baby lo a haya e nomber Hesus. Anto ken a bira e baby su tata?— E angel a bisa cu ta Yehova Dios lo ta Tata di e baby. Ta pesei nan lo a yama Hesus e Yiu di Dios.

Con bo ta kere cu Maria a haya e cos ei?— Bo ta kere cu el a bisa: “Mi no kier ta mama di Hesus”? No. Maria tawata cla pa haci loke Dios tawata kier. Pero con e Yiu di Dios den shelo por a nace como baby na tera? Con e nacemento di Hesus tawata diferente cu di tur otro baby? Abo sa?—

Wel, Dios a traha nos prome tata cu mama, Adam cu Eva, di tal manera cu nan por a bin serca otro na un manera hopi special. Despues di esei un baby por a cuminsa crece den bariga di e mama. Hende ta bisa cu e cos ei ta un milager! Mi ta sigur cu bo tambe ta haya cu ta asina.

Pero Dios a haci un milager asta mas maraviyoso. El a tuma bida di su Yiu Hesus for di shelo, anto pon’e den bariga di Maria. Dios no a yega di haci e cos ei nunca prome, y nunca mas el a bolbe hacie. Door di e milager ei, Hesus a cuminsa crece den bariga di Maria mescos cu otro baby ta crece den bariga di nan mama. Despues di esei Maria a casa cu Hose.

Ora a bira tempo pa Hesus nace, Maria cu Hose tawata di bishita na e stad di Betlehem. Pero e stad tawata yen yen di hende. No tawatin ni sikiera un camber pa Maria cu Hose. Pesei nan mester a keda den un luga manera un stal, caminda hende ta warda bestia. Ei Maria a haya Hesus, y nan a pon’e den un pesebre, manera bo por mira aki riba. Un pesebre ta un baki di cuminda pa baca y otro bestia.

Cosnan grandi a sosode riba e anochi cu Hesus a nace. Serca di Betlehem, un angel a aparece na un par di wardado di carne. El a bisa nan cu Hesus tawata un hende importante. E angel a bisa: ‘Mira! Mi ta trece un bon noticia pa boso cu lo haci hende bira contento. Awe un hende a nace cu ta bai salba e pueblo.’—Lucas 2:10, 11.

E angel a bisa e wardadonan di carne cu nan por haya Hesus na Betlehem, drumi den un pesebre. Anto diripiente mas angel den shelo a aparece hunto cu e prome angel, y nan a alaba Dios hunto. E angelnan a canta: ‘Gloria na Dios, y na tera pas meimei di hende cu ta agrad’e.’—Lucas 2:12-14.

Ora e angelnan a bai, e wardadonan di carne a bai Betlehem. E wardadonan di carne a haya Hesus ei, anto nan a conta Hose cu Maria e bon cosnan cu nan a tende. Bo por imagina bo con contento Maria a keda cu e tawata dispuesto di bira mama di Hesus?

Mas despues, Hose cu Maria a bai cu Hesus na e stad di Nazaret. Ei ta caminda Hesus a crece. Ora el a bira hende grandi el a cuminsa cu su gran trabou di siña hende. Esei tawata un parti di e trabou cu Yehova Dios tawata kier pa su Yiu haci riba tera. Hesus tawata dispuesto di haci e trabou ei pasobra e tawata stima su Tata den shelo masha hopi.

Prome cu Hesus a cuminsa su trabou como e Gran Maestro, el a laga Huan Bautista batis’e den Riu Yordan. Na e momento ei un cos asombroso a sosode! Ora Hesus a sali for di bou di awa, Yehova a papia for di shelo y bisa: “Esaki ta mi Yiu stima, den kende mi tin goso.” (Mateo 3:17) Bo no ta sinti bo bon ora bo mayornan bisa bo cu nan ta stima bo?— Nos por keda sigur cu Hesus tambe a sintie bon.

Semper Hesus tawata haci cos bon so. E no a laga hende kere cu e ta algo cu e no ta. E no a bisa hende cu e ta Dios. Angel Gabriel a bisa Maria cu nan lo yama Hesus e Yiu di Dios. Hesus mes tambe a bisa cu e ta e Yiu di Dios. Y e no a bisa hende cu e sa mas cu su Tata. El a bisa: “E Tata ta mas cu mi.”—Huan 14:28.

Asta den shelo, ora Hesus su Tata tawata dun’e trabou pa haci, Hesus tawata hacie. E no tawata bisa cu lo e hacie, anto haci otro cos na su luga. E tawata stima su Tata. Pesei e tawata tende ora su Tata papia cu ne. Anto ora Hesus a bini na tera, el a haci loke su Tata den shelo a mand’e haci. E no a pasa su tempo haciendo otro cos. No ta nada straño anto cu Yehova ta contento cu su Yiu!

Nos tambe kier pa Yehova ta contento cu nos, no?— E ora ei nos tin cu percura tende di Dios, mescos cu Hesus a haci. Dios ta papia cu nos via Bijbel. Bo ta kere cu ta bon pa nos haci manera cos cu nos ta tende di Dios, anto toch kere of haci cos cu ta bai contra loke Bijbel ta bisa?— Y corda cu si nos ta stima Yehova di berdad, nos lo gusta hacie contento.