Nunca Bira Ladron!

HENDE a yega di horta un cos for di bo?— Anto con bo a sinti?— Esun cu a horta bo tawata un ladron, y ningun hende no gusta ladron. Dicon bo ta kere cu hende ta bira ladron? Ta asina nan ta nace?—

Nos a caba di siña cu hende ta nace cu pica. Esei kiermen cu nos tur ta imperfecto. Pero ningun hende no ta nace ladron si. Tin ladron cu ta bin di bon famia. Kisas su mama, su tata y su rumannan ta hende honesto. Pero si e tin deseo pa haya cen of cos cu e por cumpra cu cen, e deseo ei por pon’e bira ladron.

Segun bo, ken tawata e prome ladron?— Laga nos pensa un rato. Tempo cu e Gran Maestro tawata biba den shelo e tawata conoce e persona ei. E ladron ei tawata un angel. Pero si Dios a traha tur angel perfecto, ta con bin e angel ei a bira ladron?— Wel, manera nos a siña den Capitulo 8 di e buki aki, e tawata desea un cos cu no ta di dje. Bo ta corda ta kico?—

Despues cu Dios a crea e prome hende homber y e prome hende mohe, e angel ei tawata kier pa nan adora e. E no tawatin derecho pa nan ador’e. Ta Dios so tin e derecho ei. Pero e angel ei a horta e derecho aki for di Dios! El a bira un ladron, pasobra el a pone Adam cu Eva adora e. El a bira Satanas e Diabel.

Ta kico ta pone hende bira ladron?— Un deseo pa cos cu no ta di nan. E deseo aki por bira asina fuerte cu e ta pone asta bon hende haci cos malo. Tin bes, hende cu ta bira ladron no ta repenti y cambia pa haci cos bon atrobe. Un di Hesus su apostelnan tawata un hende asina. Su nomber ta Hudas Iscariot.

Hudas tawata sa cu ta malo pa horta, pasobra el a siña e Lei di Dios for di tempo cu e tawata mucha chikito. E tawata sa cu un biaha Dios a asta papia for di shelo y bisa su pueblo: “No horta.” (Exodo 20:15) Ora Hudas a bira grandi el a conoce e Gran Maestro y a bira un di su disipelnan. Despues Hesus a asta scohe Hudas pa bira un di su 12 apostelnan.

Hesus cu su apostelnan tawata cana hunto di un luga pa otro. Nan tawata come hunto tambe. Y nan tawata warda tur nan placa hunto den un caha. Hesus a laga Hudas percura pa e caha. Claro cu no ta di Hudas e cen tawata. Pero, bo sa kico Hudas a cuminsa haci despues?—

Hudas a cuminsa coi placa for di e caha, sin cu e tin mag. E tawata coi placa ora e otro disipelnan no ta wak. Y asta el a busca manera pa haya mas placa. El a cuminsa pensa riba placa henter dia. Laga nos wak kico e mal deseo aki a pon’e haci net un par di dia prome cu nan a mata e Gran Maestro.

Maria, ruman di Hesus su amigo Lazaro, a coi un boter di azeta masha caro, anto bash’e riba Hesus su pia. Pero Hudas a cuminsa teima. Bo sa dicon?— E di cu lo tawata miho si nan a bende e azeta anto parti e placa pa hende pober. Pero loke e tawata kier ta pa nan a pone e cen den e caha pa e por a hort’e.—Huan 12:1-6.

Hesus a bisa Hudas pa e laga Maria na pas, pasobra ta un cos hopi bondadoso el a haci. Hudas no a keda contento cu Hesus a bis’e e cos ei. Pesei, el a bai serca e sacerdotenan principal. Nan tawata enemigo di Hesus. Nan tawatin gana di coi Hesus preso, pero nan kier a hacie anochi, pa hende no mira nan.

Hudas a bisa e sacerdotenan: ‘Mi ta bisa boso con boso por haya Hesus si boso duna mi placa. Cuanto boso ta duna mi?’

E sacerdotenan a contest’e: ‘Nos ta duna bo trinta pida plata.’—Mateo 26:14-16.

Hudas a tuma e placa. Ta manera cos cu el a bende e Gran Maestro cu e hombernan ei! Bo por imagina bo cu un hende por haci un cos asina malo?— Wel, ta asina ta pasa ora hende bira ladron y horta placa. Nan ta cuminsa stima placa mas cu nan ta stima otro hende, y asta mas cu nan ta stima Dios.

Kisas bo ta bisa: ‘Nunca lo mi no stima nada mas hopi cu mi ta stima Yehova Dios.’ Ta bon cu bo ta pensa asina. Casi sigur Hudas tambe a pensa asina ora Hesus a scoh’e pa bira su apostel. Y kisas otro hende cu a bira ladron tambe tawata pensa asina. Laga nos papia di un par di nan.

Un di nan tawata un sirbido di Dios cu yama Acan. Acan a biba hopi tempo prome cu e Gran Maestro a nace. Acan a mira un mantel masha bunita, un bara di oro y un par di pida plata. Nan no tawata di dje. Bijbel ta bisa cu nan tawata di Yehova, pasobra e pueblo di Dios a kita nan for di nan enemigonan. Pero Acan tawata kier nan asina tanto cu el a horta nan.—Hosue 6:19; 7:11, 20-22.

Ata un otro ehempel aki. Hopi tempo pasa, Yehova a scohe David pa bira rei di e pueblo di Israel. Un dia David a cuminsa wak Betsabe, un hende mohe masha bunita. El a keda wak Betsabe, y a keda pensa di hib’e su cas pa e bira su casa. Pero Betsabe tawata casa di Urias. Kico David mester a haci?—

David mester a stop di pensa riba e asunto di hiba Betsabe su cas. Pero e no a stop. Pesei, David a hib’e su cas toch. Anto despues el a laga mata Urias tambe. Dicon David a haci e cosnan malo ei?— Door cu el a keda desea casa di otro hende.—2 Samuel 11:2-27.

Door cu David a sinti duele di loke el a haci, Yehova a lag’e sigui biba. Pero awor David a hay’e cu hopi problema. Su yiu Absalon kier a kita David su puesto di rei for di dje. Pesei, ora hende tawata bin serca David, Absalon tawata brasa nan y sunchi nan. Bijbel ta bisa: “Absalon a horta curason di e hombernan di Israel.” El a pone e hendenan ei desea pa e bira rei na luga di David.—2 Samuel 15:1-12.

Bo a yega di desea un cos asina tanto, mescos cu Acan, David y Absalon?— Si e cos ei cu bo ta desea ta di otro hende, anto bo coh’e sin cu bo tin mag, ta horta bo a horta. Bo ta corda kico Satanas, e prome ladron, tawata kier?— E tawata kier pa hende adora e na luga di Dios. Esei kiermen cu ta horta Satanas a horta ora el a pone Adam cu Eva obedece e.

Ora un cos ta di un hende, e hende ei tin derecho di bisa ken tin mag di uz’e. Por ehempel, laga nos bisa cu bo a bai hunga na cas di un otro mucha. Bo tin mag di coi un cos di su cas y bai cas cu ne?— Ta si e tata of e mama di e mucha bisa bo cu bo tin mag so bo por hacie. Si bo bai cas cu un cos sin pidi, ta horta bo a horta.

Ki ora lo bo por sinti tentacion pa horta?— Ora bo ta desea un cos cu no ta di bo. Y asta si ningun otro hende no wak bo coh’e, ken si ta wak bo?— Yehova Dios. Y nos mester keda corda cu Dios tin rabia riba hortamento. Pesei, si bo ta stima Dios y bo prohimo, nunca lo bo no bira ladron.