Ken Ta Bo Dios?

PAKICO ta importante pa bo sa ken ta bo Dios?— Door cu hende ta adora hopi dios. (1 Corintionan 8:5) Ora apostel Pablo a haya poder serca Yehova pa cura un homber cu no a yega di cana nunca, e hendenan a grita: “E diosnan a haya forma di hende y a baha bini serca nos!” E hendenan kier a adora Pablo y su amigo Barnabas. Nan a bisa cu Pablo ta Mercurio, anto cu Barnabas ta Jupiter, dos dios falso.

Pero Pablo cu Barnabas no a laga e hendenan adora nan. Nan a core drenta meimei di nan y bisa nan: “Laga e cosnan vano aki y comberti na e Dios bibo.” (Echonan 14:8-15) Ken ta “e Dios bibo” cu a traha tur cos?— Si, ta Yehova, “e Haltisimo riba henter tera.” Hesus a bisa cu Yehova ta “e unico Dios berdadero.” Pesei, ta ken so merece pa hende ador’e?— Yehova so!—Salmo 83:18; Huan 17:3; Revelacion 4:11.

Mayoria hende ta adora otro dios na luga di “e unico Dios berdadero.” Hopi bes nan ta adora cos cu hende a traha di palo, piedra of metal. (Exodo 32:4-7; Levitico 26:1; Isaias 44:14-17) Tin bes nan ta bisa cu asta hende cu a bira famoso ta dios, streya of idolo. Ta bon pa duna hende famoso gloria?—

Despues cu Saulo a bira apostel Pablo, el a skirbi: “E dios di e mundo aki a ciega mente di esnan cu no ta kere.” (2 Corintionan 4:4) Ta ken e dios ei ta?— Si, Satanas e Diabel! Satanas a logra pone hende adora yen di hende y cos.

Ora Satanas a purba laga Hesus buig pa ador’e, kico Hesus a bisa Satanas?— ‘Adora Yehova bo Dios, y sirbi e so.’ (Mateo 4:10) Pues, Hesus a mustra bon cla cu ta Yehova so merece pa nos ador’e. Tawatin tres hoben cu tawata sa esei. Nan nomber ta Sadrak, Mesak y Abed-nego. Laga nos lesa tocante nan.

E mucha hombernan Hebreo aki tawata di Israel, e nacion di Dios. Solda a hiba nan como catibo na un pais cu yama Babilonia. Na Babilonia un Rei cu yama Nabucodonosor a traha un imagen di oro masha grandi mes. Un dia el a duna ordo pa ora muzik cuminsa toca, tur hende buig pa e imagen. El a spierta nan: ‘Ken cu no buig y adora e imagen, nos lo tira den e forno di candela cayente cayente.’ Kico abo lo a haci?—

Otro ora, Sadrak, Mesak cu Abed-nego tawata haci tur cos cu e rei manda nan. Pero e cos aki si nan a nenga di haci. Bo sa dicon?— Door cu e lei di Dios ta bisa: ‘Bo no mag tin ningun otro dios cu no ta ami. Bo no mag traha pa bo mes ningun imagen graba, anto buig p’e.’ (Exodo 20:3-5) Pesei, Sadrak, Mesak cu Abed-nego a haci loke e lei di Yehova a bisa y no e cos cu e rei a manda nan haci.

E rei a rabia hopi. El a manda nan trece e tres mucha hombernan Hebreo mesora su dilanti anto el a puntra nan: ‘Ta berdad cu boso no ta sirbi mi diosnan? Mi ta duna boso un chens mas. Awor, ora boso tende e muzik, buig y adora e imagen cu mi a traha. Si boso no hacie, nan ta tira boso den e forno di candela. Anto ta cua dios por scapa boso for di mi man?’

Kico e hobennan a haci e ora ei? Kico abo lo a haci?— Nan a bisa e rei: ‘Nos Dios cu nos ta sirbi por scapa nos. Pero asta si e no scapa nos, nos no ta bai sirbi bo diosnan. Nos no ta bai buig pa bo imagen di oro.’

Awor e rei a rabia bira loco. El a bisa su hendenan: ‘Haci e forno shete biaha mas cayente cu normal!’ E ora ei el a manda su hombernan fuerte pa nan mara Sadrak, Mesak cu Abed-nego, anto tira nan den e forno! E forno tawata asina cayente cu e vlamnan a mata e hombernan di e rei mes! Kico a pasa cu e tres Hebreonan?

Sadrak, Mesak cu Abed-nego a cai net meimei di e candela. Pero, e ora ei, nan a lanta para! Nada no a pasa nan. Anto nan no tawata mara mas tampoco. Con e cos ei por ta posibel?— E rei a tira bista den e candela, y el a mira un cos cu a dun’e miedo. El a puntra su sirbidonan: ‘No ta tres homber nos a tira den candela?’ Nan a contesta: “Sigur cu si, o Rei.”

E ora ei e rei a bisa: ‘Wak! Ta cuater persona mi ta mira ta cana rond eiden, anto e candela no ta haci ningun di nan nada.’ Bo sa ta ken e di cuater persona ei tawata?— Un angel di Yehova. El a proteha e tres Hebreonan pa nada no pasa nan.

Wel, ora e rei a mira e cos ei, el a bai na porta di e forno anto grita: “Sadrak, Mesak y Abed-nego, boso, sirbidonan di e Dios Haltisimo, sali bini aki!” Ora nan a sali, tur hende por a mira cu nan no a kima. Nan no tawata ni hole candela. E ora ei e rei a bisa: ‘Bendiciona sea e Dios di Sadrak, Mesak cu Abed-nego, kende a manda su angel pa scapa su sirbidonan pasobra nan no kier a adora ningun dios cu no ta nan mes Dios.’—Daniel, capitulo 3.

E cos ei cu a pasa ta siña nos un les. Awendia ainda hende sa traha imagen, prenchi of cos asina pa nan adora. Encyclopedia Americana ta bisa: “Bandera ta sagrado, mescos cu crus.” Hende sa traha imagen di palo, piedra, metal y di paña. E prome disipelnan di Hesus tawata nenga di haci acto di adoracion na e emperado Romano, esta, haci cos cu lo a mustra cu nan ta ador’e. Daniel P. Mannix, un hende cu ta skirbi tocante historia, ta bisa cu loke e disipelnan tawata haci ta manera ora hende “nenga di saluda bandera of hura lealtad na nan pais.”

Awor, bo ta kere cu Dios ta worry si ta di paña, di palo, di piedra of di metal un imagen religioso ta traha?— Un sirbido di Yehova tin mag di haci un acto di adoracion dilanti un imagen asina?— Sadrak, Mesak cu Abed-nego a nenga di hacie, y Yehova a keda contento cu nan. Con abo por sigui nan ehempel?—