Kico Ta Pasa si Nos Muri?

MANERA casi sigur bo sa caba, hende ta bira bieu, bira malo y muri. Tin biaha asta mucha ta muri. Bo mester tin miedo di muri, of di hende morto?— Bo sa kico ta pasa cu nos si nos muri?—

Wel, ningun hende cu ta na bida awe no a yega di muri anto biba bek pa e por bisa nos con morto ta. Pero ora Hesus e Gran Maestro tawata na tera si tawatin un homber cu a yega di ta morto. Si nos lesa tocante dje nos por haya sa kico ta pasa cu hende ora nan muri. E homber ei tawata un amigo di Hesus. E tawata biba na Betania, un pueblo chikito, no mucho leu for di Herusalem. E tawata yama Lazaro, y e tawatin dos ruman mohe cu yama Marta y Maria. Laga nos wak den Bijbel ta kico a pasa.

Un dia Lazaro a bira hopi malo. Door cu Hesus tawata hopi leu, Marta cu Maria a manda un mensahero bai bisa Hesus cu nan ruman homber Lazaro ta malo. Nan a manda bis’e esei door cu nan tawata sa cu Hesus por a bin y pone nan ruman homber bira bon. Hesus no ta docter, pero e tin poder di Dios pa por cura tur sorto di malesa.—Mateo 15:30, 31.

Ma prome cu Hesus a bai serca Lazaro, Lazaro a bira asina malo cu el a muri. Pero Hesus a bisa su disipelnan cu ta drumi Lazaro ta, y cu e lo bai serca Lazaro pa lant’e. E disipelnan no a compronde kico Hesus tawata kiermen. Pesei, Hesus a bisa nan francamente: “Lazaro a muri.” Kico esei ta laga nos compronde tocante morto?— Si, cu morto ta manera un soño profundo. E ta un soño asina profundo cu e hende no ta ni soña.

Ora Hesus a yega serca Marta cu Maria, hopi amigo di nan famia a yega caba. Nan a bin pa consola e ruman mohenan pa e morto di nan ruman. Ora Marta a tende cu Hesus ta bin, el a bai top’e. Un rato despues, Maria tambe a bai serca Hesus. Maria tawata hopi tristo. E tawata yora, y el a cai na rudia dilanti Hesus. Algun amigo cu a bin hunto cu Maria tambe tawata yora.

E Gran Maestro a puntra nan na unda nan a pone Lazaro, anto e hendenan a hib’e na e cueba caminda nan a dera Lazaro. Ora Hesus a mira tur e hendenan ta yora, e tambe a cuminsa yora. E sa con duro ta ora un hende cu bo ta stima ta muri y bo no tin e mas.

Door cu tawatin un piedra na entrada di e cueba, Hesus a bisa nan: “Kita e piedra.” Bo ta kere cu nan mester a kit’e?— Marta no a haya cu e cos ei ta un bon idea. El a bisa Hesus: “Señor, ya e mester ta hole malo caba, pasobra e tin cuater dia morto.”

Pero Hesus a bis’e: ‘Mi no a bisa bo cu si bo kere lo bo mira e gloria di Dios?’ Loke Hesus tawata kiermen ta cu Marta tawata bai mira un cos cu lo trece honor pa Dios. Kico Hesus tawata bai haci? Despues cu nan a kita e piedra, Hesus a resa na Yehova pa tur hende tende. E ora ei Hesus a bisa cu un stem duro: “Lazaro, bin pafo!” Lazaro a sali? E por a sali anto?—

Pensa un rato. Abo por lanta un hende cu ta na soño?— Si. Si bo yam’e cu un stem duro, e ta lanta. Pero bo por lanta un hende cu ta drumi morto?— No. Ni maske con duro bo grita, e hende morto no ta tende. No tin nada cu ni abo ni ami ni ningun otro hende na tera awe por haci pa lanta un hende morto.

Pero cu Hesus si no ta asina. Dios a dun’e poder special. Pesei, ora Hesus a yama Lazaro, un cos asombroso a sosode. E homber cu tawatin cuater dia morto a sali for di e cueba! El a bolbe biba! E por a hala rosea, cana y papia atrobe! Si, Hesus a lanta Lazaro for di morto.—Huan 11:1-44.

Awor, pensa un rato: Kico a pasa cu Lazaro ora el a muri? Tawatin un parti di dje, un alma of un spirito, cu a sali for di su curpa y bai biba otro caminda? Lazaro su alma a bai shelo? El a biba e cuater dianan aya cerca Dios cu e angelnan santo?—

No, no ta esei a pasa. Corda cu Hesus a bisa cu Lazaro tawata na soño. Con abo ta ora bo ta na soño? Ora bo ta den un soño hopi profundo bo no sa mes kico ta pasa rond di bo, no?— Y ora bo lanta bo no sa ta cuanto tempo bo a drumi, te ora bo wak oloshi.

Asina ta tambe cu hende ora nan ta morto. Nan no sa nada. Nan no ta sinti nada. Y nan no por haci nada. Ora Lazaro tawata morto, ta asina e tambe tawata. Ora un hende ta morto e ta manera den un soño profundo, y e no ta corda nada. Bijbel ta bisa cu “e mortonan no sa nada.”—Eclesiastes 9:5, 10.

Pensa esaki tambe: Si Lazaro a pasa cuater dia den shelo, bo no ta kere cu e lo a conta hende con shelo ta?— Y si ta den shelo e tawata, bo ta kere cu Hesus lo a pon’e bin tera bek for di un luga asina bon?— Claro cu no!

Toch tin hopi hende ta bisa cu nos alma ta un parti di nos, un cos cu nos tin, y cu ora nos curpa muri, e alma ei ta sigui biba. Nan ta bisa cu Lazaro su alma tawata bibo un caminda. Pero Bijbel no ta bisa asina. E ta bisa cu Dios a haci Adam, e prome homber bira “un alma bibo.” Adam tawata un alma. Bijbel ta mustra tambe cu ora Adam a peca, el a muri. El a bira un alma morto, y el a bai bek na e stof cu Dios a trah’e di dje. Y Bijbel ta bisa cu tur Adam su yiunan tambe a haya pica y morto for di Adam.—1 Corintionan 15:45; Salmo 107:9; Romanonan 5:12.

Esei ta mustra bon cla cu nos alma no ta un cos apart for di nos curpa, of un cu nos tin. Cada un di nos mes ta un alma. Y door cu hende a hereda pica for di e prome homber Adam, Bijbel ta bisa cu “e alma cu peca lo muri.”—Ezekiel 18:4.

Tin hende cu tin miedo di hende morto. Nan no kier bai banda di santana pasobra segun nan hende morto tin alma cu por sali for di nan curpa y cu por haci hende bibo daño. Pero un hende morto por haci un hende bibo algo?— No, e no por.

Tin hende asta ta kere cu hende morto por bin bek den forma di spirito pa bishita hende bibo. Pesei nan ta pone cuminda pa hende morto. Pero si un hende haci asina, e no por ta kere completamente loke Dios ta bisa tocante hende morto. Si nos ta kere loke Dios ta bisa, e ora ei nos no tin miedo di hende morto. Y si di berdad nos ta gradicido na Dios pasobra el a duna nos bida, anto nos lo mustra cu nos ta gradicido door di haci cos cu Dios ta keda contento cu ne.

Pero kisas bo ta puntra bo mes: ‘Dios ta bai pone mucha cu a muri biba bek? E kier hacie di berdad?’ Laga nos papia riba esei den e siguiente capitulo.