Prologo

Kerido Lector,

“Bin, sigui mi.” (Marco 10:21) En realidad, cu e palabranan ei Hesucristo ta invita nos pa siguie. Abo ta reaccionando riba su yamada? Si bo ta haci esei, lo e tin un impacto profundo riba bo bida. Dicon?

Jehova a manda su Yiu unigenito na mundo pa duna su bida como un rescate. (Juan 3:16) Banda di esei, e Yiu ei a mustra nos con pa hiba nos bida. Den tur loke el a haci, el a mantene su integridad y a haci curason di su Tata contento. Tambe Hesus a mustra nos con nos por ta mescos cu su Tata. E palabranan y accionnan di e Yiu a refleha perfectamente e manera di actua y e boluntad di e Tata.—Juan 14:9.

Bijbel ta bisa cu Hesus ta ‘un ehempel pa nos sigui den su pasonan.’ (1 Pedro 2:21) Si nos kier hala mas cerca Jehova, si nos kier tin for di awor un bida cu berdadero proposito y si nos kier keda riba e caminda cu ta hiba na bida eterno, nos tin cu sigui den e pasonan di Cristo cu sumo cuidou y atencion.

Pa cuminsa e trayecto aki, nos tin cu familiarisa nos mes cu Hesus su bida riba Tera. Pues, ta bale la pena pa studia cuidadosamente e descripcion di Hesus cu tin conserva den Bijbel. Algo cu lo yuda nos mira mas cla con nos por sigui Hesus ta di medita riba e cosnan cu el a bisa y haci, y considera con nos por imit’e den palabra y accion.

Nos ta spera cu e publicacion aki lo yuda bo crece den bo amor pa Hesus y pa Jehova. Y laga e amor ei motiva bo pa sigui den e pasonan di Hesus cu sumo cuidou y atencion di manera cu abo por haci Jehova su curason contento awor y pa semper.