Un Carta di Cuerpo Gobernante

Na Tur Hende Cu Ta Stima Jehova,

Hesus a bisa: “Boso lo conoce e berdad, y e berdad lo haci boso liber.” (Juan 8:32) E palabranan ey ta masha alentador! Si, nos por siña conoce e berdad hasta den e “ultimo dianan” critico aki den cua ta reina falsedad y mentira. (2 Timoteo 3:1) Bo ta corda con emociona bo a bira ora bo a siña e berdad cu tin den e Palabra di Dios? Esta un experencia maraviyoso!

Sinembargo, maske con importante ta pa nos tin conocemento exacto di e berdad y pa compartie ­regularmente cu otro hende, nos mester biba tambe na harmonia cu e berdad. Pa nos por haci esey, nos tin cu keda den e amor di Dios. Kico esaki ta encera? Loke Hesus a bisa e anochi prome cu su morto ta contesta e pregunta aki. El a bisa su fiel apostelnan: “Si boso ta cumpli cu mi mandamentonan, boso lo keda den mi amor, mescos cu ami a cumpli cu e mandamentonan di mi Tata y ta keda den su amor.”​—Juan 15:10.

Tuma nota cu Hesus a keda den e amor di Dios ­pasobra el a obedece e mandamentonan di su Tata. Esaki ta conta pa nos tambe. Pa nos keda den e amor di Dios, nos tin cu laga e berdad guia nos den tur loke nos ta haci. E mesun anochi ey Hesus a bisa: “Ya cu boso sa e cosnan aki, boso lo ta feliz si boso haci nan.”​—Juan 13:17.

Nos ta spera sinceramente cu e buki aki lo yuda bo sigui biba na harmonia cu e berdad y asina “keda den e amor di Dios . . . cu bida eterno na bista.”​—Judas 21.