Con Nos Ta Yuda Nos Rumannan Cu Pasa den Calamidad?

Ora un desaster tuma luga, mesora testigonan di Jehova ta dal paso pa yuda nan rumannan cu keda afecta. Tal esfuersonan ta demostra e berdadero amor cu nos tin pa otro. (Juan 13:34, 35; 1 Juan 3:17, 18) Den ki manera nos ta yuda?

Nos ta duna yudansa financiero. Den prome siglo, ora hamber severo a asota Judea, e cristiannan na Antiokia a manda placa pa yuda nan rumannan den fe. (Echonan 11:27-30) Awe tambe, asina cu nos haya sa cu nos rumannan na cierto parti di mundo ta den dificultad, nos ta manda donacion via nos congregacion pa duna yudansa material na esnan cu ta den gran necesidad.—2 Corintionan 8:13-15.

Nos ta duna yudansa practico. Ancianonan cu ta na e luga di desaster ta haci esfuerso pa localisa cada miembro di nan congregacion y ta haci sigur cu nan ta sano y salvo. Un comite di yudansa ta coordina suministro di cuminda, awa di bebe y paña y ta percura tambe pa alohamento y yudansa medico. Hopi Testigo cu tin cierto ofishi ta bay yuda boluntariamente riba nan propio gasto. Nan ta duna un man den e trabounan di auxilio of ta yuda drecha casnan y Salonnan di Reino cu a sufri daño. E union cu tin den nos organisacion y e experencia cu nos a gana trahando como team ta permiti nos mobilisa lihe ora mester duna yudansa. Aunke nos meta ta pa yuda “nos rumannan den fe”, ora ta posibel, nos ta yuda otro hende tambe sin importa di cua religion nan ta.—Galationan 6:10.

Nos ta duna consuelo for di e Scritura y sosten emocional. Loke victimanan di desaster tin mas mester di dje ta consuelo. Den situacionnan asina, nos ta haya fortaleza for di Jehova, e “Dios di tur consuelo.” (2 Corintionan 1:3, 4) Pesey, gustosamente nos ta comparti e promesanan di Bijbel cu hende cu ta den angustia. Nos ta duna nan e siguransa cu pronto e Reino di Dios lo pone un fin na tur tragedia cu ta causa dolor y sufrimento.—Revelacion 21:4.

• Kico ta permiti Testigonan mobilisa mesora pa yuda na momento di desaster?

• Ki consuelo for di e Scritura nos por duna sobrevivientenan?