Josias Tabatin Bon Amigo

Abo ta haya cu ta dificil pa haci loke Dios ta bisa?— Mayoria di hende ta haya cu si. Bijbel ta conta nos di un mucha homber cu yama Josias. Tabata hopi dificil mes pa Josias haci loke Dios ta bisa. Pero e tabatin bon amigo, anto nan a yud’e. Ban lesa mas di Josias y su amigonan.

Josias tabata yiu di Amon, un Rey na Juda. Amon tabata hopi mal hende. E tabata adora dios falso. Ora Amon a muri, Josias a bira Rey. Pero ta ocho aña so e tabatin! Bo ta kere cu el a bira mal hende mescos cu su tata?— No!

For di tempo cu Josias tabata mucha chikito, e kier a haci loke Jehova ta bisa. Pesey, ta hende cu stima Jehova so el a scoge como amigo. Anto nan a yuda Josias haci loke Dios ta bisa. Ken tabata algun di Josias su amigonan?

Un di nan ta Sofonias. Sofonias ta un profeta cu a bisa e hendenan di Juda cu si nan adora dios falso cos malo lo pasa cu nan. Josias a scucha di Sofonias y a adora Jehova so y no dios falso.

Un otro amigo di Josias ta Jeremias. Nan tabatin casi e mesun edad. Anto tempo cu nan tabata mucha, nan tabata biba basta cerca di otro. Nan tabata asina bon amigo cu, ora Josias a muri, Jeremias a traha un cantica special pa bisa cuanto el a sinti Josias su falta. Jeremias y Josias a yuda otro haci loke Jehova ta bisa.

Kico e ehempel di Josias ta siña bo?— For di dia cu Josias tabata chikito, e kier a haci loke Jehova ta bisa. E tabata sa cu su amigonan mester ta hende cu ta stima Jehova. Ta hopi importante pa abo tambe scoge amigo cu ta stima Jehova y cu por yuda bo haci loke e ta bisa!