E Programa Educativo di Reino​—Sirbidornan di e Rey Ta Haya Entrenamento

BO TA wak e orador riba plataforma y bo ta smile. E ta un ruman homber jong di bo congregacion y ta su prome discurso na un asamblea. Mientras cu bo ta scucha su discurso, bo ta pensa cu aprecio riba e entrenamento cu e pueblo di Dios ta haya. Bo ta corda e prome partinan cu el a duna riba plataforma. Esta un goso pa mira con el a progresa! El a mehora hopi ora el a bay e Scol di Sirbishi di Pionero. Recientemente, e cu su esposa a asisti na e Scol pa Predicador di Reino. Bo ta bati man pa e bunita discurso cu e ruman a duna, mientras bo ta wak rond y ta pensa riba tur e instruccion cu e pueblo di Dios rond mundo ta haya.

Bijbel a profetisa cu lo yega un tempo cu “[Jehova] lo siña” henter su pueblo. (Isa. 54:13) Nos ta bibando den e tempo ey. Nos ta haya e educacion aki no solamente via nos publicacionnan sino tambe via nos reunionnan, asambleanan, congresonan y e diferente scolnan cu ta prepara nos pa asignacionnan specifico den e organisacion di Jehova. Den e seccion aki, nos lo wak con henter e programa di educacion aki ta duna prueba solido cu e Reino di Dios ta gobernando awe.