PREGUNTA 5

Con Mi Por Trata cu Bullying na Scol?

DICON TA BON PA BO SA?

E manera cu bo ta reacciona por drecha e situacion of haci esaki pio.

**KICO ABO LO HACI?**

Imagina bo e siguiente escena: Thomas no kier bay scol awe, ni mañan. E no kier bay scol mas at all. Tur cos a cuminsa tres luna pasa ora cu algun mucha di su scol a cuminsa gaña yen cos riba dje. Despues nan tabata dun’e yen di nomber. Tin biaha nan tabata dal su bukinan fo’i su man benta abou y haci manera nan no por a yuda. Of un hende den e grupo su tras ta push’e y ora cu Thomas bira wak, e no sa ta ken a push’e. Ayera, e bullying a bira pio ora cu Thomas a haya un menasa riba un red social . . .

Si ta abo ta Thomas, kico lo bo haci?

PARA KETO Y PENSA

Bo por haci algo. De echo, bo por defende bo mes contra bullying sin bringa. Con?

NO REACCIONA. Bijbel ta bisa: “Un hende bobo no por domina su sintimentonan, pero un hende sabi ta keda calmo y ta wanta nan aden.” (Proverbionan 29:11, NW) Si bo keda mas trankil posibel, aunke ta di pafo, nan ta perde gana di sigui ter bo.
NO PAGA MALO CU MALO. Bijbel ta bisa: “No paga malo cu malo.” (Romanonan 12:17) Si bo tuma venganza, ta pio so e situacion por bira.
EVITA PELIGER. Bijbel ta bisa: “Un hende prudente ta mira maldad y ta sconde.” (Proverbionan 22:3) Te asina leu cu ta posibel, evita hende cu por causa problema y evita situacionnan den cua nan por ter bo.
PURBA DI BISA ALGO CU LO SORPRENDE NAN. Bijbel ta bisa: “Un contesta suave ta kita rabia.” (Proverbionan 15:1) Bo por te hasta purba di haci wega. Por ehempel, si un hende ta tenta bo pasobra bo ta gordo, bo por hisa bo schouder y bisa: “Berdad, porta mi por perde un par di kilo.”
CANA BAY. Nora, di 19 aña, a bisa: “Ora bo keda keto, bo ta mustra cu bo ta un persona maduro y cu bo ta mas fuerte cu e persona cu ta tenta bo. Esey ta mustra cu bo tin dominio propio, algo cu e persona cu ta tenta bo no tin.”—2 Timoteo 2:24.
PURBA DI TA MAS SIGUR DI BO MES. Personanan cu ta ter otro hende hopi biaha ta ripara ken ta esnan cu no tin mucho confianza den nan mes y cu casi sigur lo no defende nan mes. Di otro banda, si bo mustra e personanan cu ta ter bo cu nan no por intimida bo, hopi di nan lo stop di molestia bo.
BISA UN HENDE. Un ex-maestro di scol ta bisa: “Mi kier anima tur mucha pa no keda keto ora otronan ta ter nan. E mihor cos cu bo por haci ta di bisa un hende, y esey por preveni cu nan ta ter otro mucha.”

Un mucha homber ta para cu hopi confianza contra un otro cu ta ter e — Si bo ta sigur di bo mes, esey lo duna bo un tipo di forsa cu esun cu ta ter bo no tin

**KICO BO SA DI BULLYING?**
CORECTO OF INCORECTO	E CONTESTANAN
1 Semper bullying a existi.	1 Corecto. Por ehempel, Bijbel ta papia di un grupo di gigante cu yama nefilim. E nomber ey ta nifica “esnan cu ta pone otronan cay.” —Genesis 6:4.
2 No tin nada malo den bullying. Ta cos normal.	2 Incorecto. Bullying ta un di e motibonan cu a pone hopi hoben comete suicidio.
3 E mihor manera pa stop un hende di ter bo ta di ter e bek.	3 Incorecto. Hopi biaha e mucha cu ta ter un otro tin mas forsa cu su victima; pues, no ta bale la pena pa purba di tuma venganza.
4 Si bo mira un mucha ta ter un otro, ta mihor bo haci manera bo no a mira nada.	4 Incorecto. Si bo no bisa nada, bo por bira complice di bullying. Lo bo por te hasta bira parti di e problema en bes di e solucion.
5 En realidad, e mucha cu ta gusta ter otro ta hopi insigur di su mes.	5 Corecto. Aunke cierto mucha cu ta gusta ter otro kier sa cu nan ta masha cos, hopi di nan ta insigur di nan mes y ta rebaha otro hende pa nan por sinti nan mes mas mihor.
6 Un mucha cu ta gusta ter otro por cambia.	6 Corecto. Cu yudansa di otro hende, un mucha cu ta gusta ter por cambia su manera di pensa y actua.