Cuanto Balor un Consenshi Limpi Tin?

“HUES A Ordena Gobierno pa Tuma R$ 20.000.” E titular straño aki a aparece resientemente den e corant di Brasil Correio do Povo. E articulo a relata e historia di Luiz Alvo de Araújo, un postbode local cu a bende un pida tereno cu gobierno. Despues cu Luiz a pasa e acta di traspaso di e tereno, pa su sorpresa, el a descubri cu nan a pag’e 20.000 real Brasilero (mas o menos 14.400 florin) mas cu e prijs cumbini!

No tawata facil pa debolbe e placa di mas. Despues di varios bishita sin resultado na departamentonan di gobierno, Luiz a ser conseha pa busca un abogado y hiba e caso corte. E hues cu a ordena gobierno pa tuma e cen, y paga e gastonan di e caso, a remarca: “Aparentemente un hende a comete un fayo, y debi na burocracia, ningun hende no tawata sa con pa resolve e asunto. Ta prome bes cu mi ta haya mi cu un caso asina.”

Luiz, kende ta un Testigo di Yehova, ta splica: “Mi consenshi biblicamente entrena lo no a laga mi keda cu loke legalmente no tawata di mi. Mi mester a debolbe e cen.”

Hopi hende lo haya e actitud di Luiz straño of asta incomprendibel. Pero e Palabra di Dios ta mustra cu Cristiannan berdadero ta duna hopi balor na un consenshi limpi den nan trato cu autoridad. (Romanonan 13:5) Testigonan di Yehova ta determina pa mantene un ‘bon consenshi, y comporta nan mes den tur cos na un manera honorabel.​—Hebreonan 13:18.