“Bo Ta un Mohe Excelente”

E palabranan di elogio aki a ser dirigi na un mohe Moabita jong. E tawata un biuda cu yama Rut, suegra di un mohe Israelita, Noemi. Rut a biba den Israel un 3.000 aña pasa, tempo cu huesnan tawata goberna, y a bin haya e fama di ta un mohe excelente. (Rut 3:11) Kico a dun’e e reputacion aki? Kico nos por siña di su ehempel?

Como hende cu no a come “pan di flohedad”, Rut a traha duro pa oranan largo recohiendo loke a sobra di cosecha den cunucu. Nan a consider’e un mohe hopi diligente y a elogi’e pa esei. Asta ora a ofrec’e un trabou mas leve, el a sigui traha duro, haciendo mas di loke por a spera di dje. E si a echt cuadra cu e descripcion cu Bijbel ta duna di un esposa elogiabel, capas y trahado.​—Proverbionan 31:10-31; Rut 2:7, 15-17.

E factornan principal cu a duna Rut su bon reputacion tawata su cualidadnan spiritual, manera su actitud humilde di sacrificio propio y su amor leal. Despues cu el a bandona su mayornan y su tera natal, cu masha poco speransa di haya e siguridad cu un matrimonio lo a trece, el a pega na Noemi. Na mesun tempo, Rut a expresa e deseo di sirbi Yehova, e Dios di su suegra. E relato biblico ta pone enfasis riba cuanto balor e tawatin bisando cu e tawata “miho pa [Noemi] cu shete yiu homber.”—Rut 1:16, 17; 2:11, 12; 4:15.

Aunke Rut su reputacion como mohe excelente entre e otro mohenan di su tempo tawata digno di elogio, hopi mas importante tawata e manera faborabel cu Dios a mira su cualidadnan y e manera cu el a recompens’e cu e privilegio di bira antepasado di Hesucristo. (Mateo 1:5; 1 Pedro 3:4) Rut ta un bunita ehempel no solamente pa mohenan cristian sino pa tur hende cu ta bisa cu nan ta adora Yehova.