“Boso Sa Dicon Mi A Trece Boso Placa Bek?”

MI TIN echt hopi mester di poco placa!’ Nana tawata pensa. E ta un mama soltero di tres yiu homber y ta biba na Kaspi, Republica di Georgia. Un mainta su soño a bira realidad. El a haya 300 lari (cu ta ekivalente na 270 florin Arubiano) den bicindario di warda di polis. No tawatin ningun hende eibanda. Esaki tawata un suma hopi grandi di placa. De echo, for di cinco aña pasa cu lari a bira e moneda nacional, nunca Nana a yega di mira un papel di 100 lari. Comerciantenan local por traha añanan largo sin gana e suma ei.

‘Kico mi ta haci cu e placa aki, si pa su motibo mi perde mi fe, mi temor pa Dios y mi spiritualidad?’ Nana a pensa. El a cultiva e cualidadnan cristian ei, y asta a persevera ora el a ser persigui y bati cruelmente pa motibo di su fe.

Ora Nana tawata cana bai e warda di polis, el a mira cinco polis ta busca algo desesperadamente. El a comprende cu ta e placa nan tawata busca, pesei el a bai serca nan y a puntra nan: “Boso a perde algo?”

“Si, cen”, nan a contesta.

“Cuanto?”

“Tresshen lari!”

“M’a haya boso placa”, Nana a bisa nan. Anto el a puntra nan: “Boso sa dicon mi a trece boso placa bek?” Nan no tawata sa.

“Pasobra mi ta un Testigo di Yehova. Si mi no tawata un Testigo, lo mi no a trece boso placa bek.”

E hefe di polis cu a perde e placa a duna Nana 20 lari como recompensa pa su conducta honesto.

Masha lihe hende den henter e districto di Kaspi a tende loke a pasa. E siguiente dia, un señora cu ta haci limpiesa saliendo for di e warda di polis a bisa Nana: “[E hefe] semper sa tin boso literatura den su oficina. Probablemente lo e bai aprecia boso literatura asta mas tanto.” Un agente policial asta a bisa: “Si tur hende tawata Testigo di Yehova, ta ken lo a comete crimen?”