Bo Ta Corda?
Bo a disfruta di e edicionnan resien di E Toren di Vigilancia? Wel, wak si bo por contesta e siguiente preguntanan:
• Kico ta empatia, y dicon cristiannan mester cultiv’e?
Empatia ta e habilidad di pone nos mes den sapato di un otro hende, por ehempel, door di sinti e dolo cu un otro persona ta sinti. Bijbel ta conseha cristiannan pa mustra ‘compasion cu otro, stima manera ruman, y sea misericordioso.’ (1 Pedro 3:8) Yehova a duna nos un ehempel di mustra empatia pa asina nos por imit’e. (Salmo 103:14; Zacarias 2:8) Nos por bira mas atento pa mustra empatia na otro hende door di scucha, observa y uza nos imaginacion.—15/4, pagina 24-6.
• Pa haya berdadero felicidad, dicon curacion spiritual mester bini prome cu e solucion final di tur incapasidad fisico?
Hopi hende fisicamente sano ta infelis, yen di problema. Na contraste, hopi cristian cu awe tin incapasidad fisico ta sirbi Yehova masha felis di nan. Esnan cu beneficia di curacion spiritual tin e chens di experencia eliminacion di tur incapasidad fisico den e mundo nobo.—1/5, pagina 6-7.
• Dicon Hebreonan 12:16 ta pone Esau den mesun categoria cu un hende inmoral?
E relato biblico ta mustra cu Esau a desplega un mentalidad cu a concentra riba recompensa inmediato y un falta di aprecio pa cos sagrado. Si awe un hende permiti e tipo di mentalidad ei desaroya den dje, esaki lo por hiba na pica serio, manera inmoralidad sexual.—1/5, pagina 10-11.
• Ken Tertuliano tawata, y pa kico e ta famoso?
E tawata un escritor y teologo cu a biba den siglo 2 y 3 di nos era. E ta famoso pa e cantidad di obranan literario cu el a skirbi na defensa di cristianismo pa nomber. Segun cu e tawata duna su defensa, el a introduci ideanan y conceptonan filosofico cu a pone e base pa doctrinanan robes manera Trinidad.—15/5, pagina 29-31.
• Dicon genetica no ta completamente responsabel pa malesa, comportacion y morto di hende?
Cientificonan a conclui cu aparentemente tin un causa genetico pa varios malesa humano, y tin ta kere cu nos comportacion ta ser determina door di nos genenan. Sinembargo, Bijbel ta duna nos un bista di hende su origen, incluso con bini humanidad ta sufri di pica y imperfeccion. Aunke nos genenan kisas ta hunga un papel den forma nos personalidad, nos imperfeccion y nos ambiente tambe tin un gran influencia.—1/6, pagina 9-11.
• Con un fragmento di papiro cu nan a haya na Oxyrhynchus, Egipto, ta aclara e uzo di e nomber di Dios?
E fragmento aki di Job 42:11 y 12 di e version Griego Septuaginta ta contene e Tetragramaton (e cuater letternan Hebreo di e nomber di Dios). Esaki ta mas prueba cu e nomber di Dios na Hebreo a aparece den e Septuaginta, e traduccion di Bijbel for di cua e escritornan di e Scritura Griego Cristian a cita hopi bes.—1/6, pagina 30.
• E espectaculonan violento y mortal di gladiado di e Imperio Romano a ser compara cu cua deportenan moderno cu hende ta gusta wak?
Un exhibicion resien den e Coliseo di Roma, Italia, a mustra cu tin paralelo moderno. Eseinan a bira bisto den e varios video clipnan di pelea di toro, boxeo profesional, careda di auto y motocicleta, y disturbio bou di fanaticonan cu ta lanta contra otro na otro eventonan deportivo moderno. E prome cristiannan a tuma na pecho cu Yehova no stima violencia ni hende violento, y pesei cristiannan djawe tampoco no mester stima nan. (Salmo 11:5)—15/6, pagina 29.
• Segun cu nos ta haci esfuerso pa bira maestronan eficas, kico nos por siña for di e ehempel di Esdras?
Esdras 7:10 ta enfatisa cuater cos cu Esdras a haci, cosnan cu nos por haci esfuerso pa imita. E texto ta bisa: “Esdras a [1] dedica su curason [2] pa studia e lei di SEÑOR y [3] pa pon’e na practica, y [4] pa siña e hendenan di Israel su statuutnan y ordenansanan.”—1/7, pagina 20.
• Den ki dos situacion ta apropiado pa un hende mohe cristian mara of tapa su cabes?
Uno ta den situacionnan cu ta surgi na cas. Ora e mara su cabes e ta mustra cu e ta reconoce cu su esposo ta responsabel pa hiba delantera den haci oracion y duna instruccion biblico. E otro ta den actividadnan di congregacion, caminda e ta mustra cu e ta reconoce cu ta hende homber batisa tin e autorisacion biblico pa siña y dirigi. (1 Corintionan 11:3-10)—15/7, pagina 26-7.
• Dicon cristiannan ta reconoce cu yoga ta encera mas cu simplemente ehercicio y cu e ta peligroso?
E meta di yoga como disiplina ta pa yuda un persona uni cu un spirito sobrehumano. Contrario na Dios su instruccion, yoga ta encera para tur pensamento spontaneo. (Romanonan 12:1, 2) Yoga por expone un persona na e peligernan di spiritismo y cosnan sobrenatural. (Deuteronomio 18:10, 11)—1/8, pagina 20-2.