Sinseridad—Un Cualidad Deseabel, Pero Esei So Ta Basta?

SINSERIDAD ta realmente deseabel den nos bida di tur dia? Un hende sinsero ta un hende cu no ta fingi; mas bien, e ta honesto y franco. No tin duda cu e cualidad aki ta yuda fortalece bon relacion cu otro hende. Apostel Pablo a duna e spiertamento: “Obedece esnan cu ta boso shonnan riba tera, no pa bista, manera esnan cu solamente ta agrada hende, ma cu sinseridad di curason, y cu temor pa Señor.” (Colosensenan 3:22) Ken lo no keda contento di por tin un persona sinsero asina ta traha p’e? Awe, hende sinsero tin mas chens di haya un trabou y manten’e.

Pero loke ta haci sinseridad asta mas deseabel ta e bon efecto cu esei tin riba nos relacion cu Dios. E Israelitanan di antiguedad a ricibi Dios su bendicion ora nan a warda e leinan y fiestanan cuidadosamente. Ora Pablo a papia tocante limpiesa den congregacion, el a stimula e cristiannan: “Laga nos celebra e fiesta, no cu zuurdeeg bieu, ni cu e zuurdeeg di malicia y maldad, ma cu e pan sin zuurdeeg di sinseridad y berdad.” (1 Corintionan 5:8) Pa Dios acepta nos adoracion, sinseridad no ta djis un cualidad deseabel sino tambe esencial. Sinembargo, tuma nota cu sinseridad so no ta basta. E mester ta basa tambe riba loke ta berdad.

Kisas e personanan cu a construi Titanic y e pasaheronan riba dje a kere sinseramente cu e barco grandi aki no por a sink. Sinembargo, riba su biahe inaugural na 1912, el a dal den un ijsberg y 1.517 hende a perde nan bida. Algun Hudiu di prome siglo kisas a kere sinseramente den nan manera di adora Dios, pero nan celo no tawata “segun conocemento.” (Romanonan 10:2) Pa nos ta bon mira den bista di Dios, nos creencianan sinsero mester ta basa riba informacion exacto. Testigonan di Yehova den bo comunidad gustosamente lo yuda bo analisa kico kiermen sirbi Dios cu sinseridad y berdad.