‘Salomon No Tawata Bisti Manera Un di Esakinan’

FLOR di sabana manera esnan cu bo ta mira riba e pagina aki ta un bista normal canto di caminda den parti suit di Africa. Nan ta yama nan cosmos, y originalmente nan ta bini di e area tropical di America. E flornan bunita aki kisas ta pone nos corda un les cu Hesus a siña hende. Hopi di su oyentenan tawata hende pober, y nan tawata precupa tocante nan necesidadnan fisico, esta, cuminda y paña.

Hesus a puntra: “Pakico boso ta precupa boso mes cu bistimento? Mira con e lelinan di sabana ta crece; nan no ta traha mata curpa, ni nan no ta hila, ma mi ta bisa boso cu asta Salomon den tur su gloria no tawata bisti manera un di esakinan.”—Mateo 6:28, 29.

Hende a sugeri varios posibilidad relaciona cu e tipo spesifico di flor di sabana cu Hesus tawatin na mente. Sinembargo, Hesus a compar’e cu gewoon yerba di sabana, bisando: “Ma si di tal manera Dios ta bisti e yerba di sabana, cu awe t’ei y mañan ta wordo tira den forno, lo E no haci mucho mas pa boso, o hendenan di poco fe?”—Mateo 6:30.

Aunke e flornan cosmos no a crece originalmente den Israel, nan sigur ta confirma e les cu Hesus a siña otronan. Sea cu bo mira nan djaleu of bo examina nan djacerca, nan ta masha bunita mes y sacado di potret y artista gusta saca nan potret of pinta nan. Di berdad Hesus no a exagera ora el a bisa, “asta Salomon den tur su gloria no tawata bisti manera un di esakinan.”

Kico ta e les pa nos awe? Hende cu ta sirbi Dios por ta sigur cu lo E yuda nan haya e necesidadnan di bida asta den tempo dificil. Hesus a splica: “Busca [Dios] su reino, y e cosnan aki [manera cuminda y paña necesario] lo wordo añadi na boso.” (Lucas 12:31) Si, nos ta haya berdadero beneficio door di busca e Reino di Dios. Pero bo sa kico e Reino di Dios ta y kico lo e haci pa humanidad? Testigonan di Yehova gustosamente lo yuda bo haya e contesta for di Bijbel.