Dios Su Punto di Bista di e Mortonan

MORTO di un ser keri ta un cos masha duro mes. E bashi, e soledad y e sintimento di perdida ta inmenso. Perdida di un ser keri por pone un hende sintie impotente, pasobra sin importa con rico of poderoso e por ta, of cuanto influencia e por tin, ningun hende riba tera actualmente por lanta un persona for di morto.

Sinembargo, nos Creador ta mira asuntonan di un manera diferente. Ya cu el a forma e prome ser humano di stof, no ta dificil pa e haci esaki den caso di un hende morto. Pa e motibo aki, Dios por mira e mortonan como si fuera nan ta na bida. Tocante sirbidonan fiel di pasado cu a muri, Hesus a bisa: “Pasobra pa e tur ta biba.” Cu otro palabra, desde Dios su punto di bista nan tur ta bibo.—Lucas 20:38.

Ora Hesus tawata riba tera, el a haya poder pa resusita e mortonan. (Huan 5:21) Pues, e tin e punto di bista di su Tata relaciona cu esnan cu a muri fiel. Por ehempel, ora su amigo Lazaro a muri, Hesus a bisa su disipelnan: “Ami ta bai pa mi lant’e for di soño.” (Huan 11:11) Desde e punto di bista di hende, Lazaro tawata morto, pero pa Yehova y Hesus, Lazaro tawata drumi.

Bou di e Reino di Hesus, lo tin “un resureccion di tanto e hustonan como e malbadonan.” (Echonan 24:15) Cu tempo, esnan cu a resusita lo haya educacion for di Dios y lo tin e speransa di biba pa semper riba tera.—Huan 5:28, 29.

Si, morto di un ser keri por causa hopi dolor y pena, y esaki ta algo cu por dura pa hopi tempo. Pero ora nos ta mira morto di hende for di e punto di bista di Dios, esei por duna nos hopi consuelo y yena nos cu speransa.—2 Corintionan 1:3, 4.