“Pa Promove e Nomber di Yehova”

ROND mundo, E Toren di Vigilancia y su compañero, e revista Spierta!, ta masha gusta pa nan contenido spiritual y balor instructivo. Esaki a keda demostra den e siguiente carta cu un lector na Francia a skirbi resientemente:

“Mi ta un señora jong, originalmente di Africa, cu masha poco scol. Poco tempo pasa, mi a cuminsa lesa boso revistanan. E temanan a atrae mi, y door di nan mi a bin descubri e importancia di lesa. Danki na boso, mi vocabulario a bira mas amplio y awor mi por skirbi un carta cu menos fout aden.

Mi ta keda asombra con boso ta trata tur loke tin di aber cu hende, nos planeta y e Creador. E articulonan aki ta asina facil pa compronde cu nan ta duna hende smak pa lesa. Ningun otro grupo tin e capasidad pa siña tur tipo di hende pareu.

Tambe mi ta keda asombra ora mi mira cu boso ta haci tur esaki no pa propositonan comercial, sino simplemente pa promove e nomber di Yehova. Mi sa cu su bendicion ta riba boso, y mi ta gradici boso. Por fabor, laga e Creador sigui duna boso forsa pa boso por siña nos.”

Actualmente Testigonan di Yehova ta efectuando nan obra di educacion biblico den 235 pais. Nan ta publica E Toren di Vigilancia den 148 idioma y Spierta! den 87. Nan no ta imprimi e revistanan aki pa alaba hende. E conseho biblico y e informacion actualisa cu nan ta contene ta diseña pa honra e Creador, kende ta bisa: “Ami, Yehova, ta . . . Esun cu ta siña bo beneficia bo mes.” (Isaias 48:17, NW) Nos ta spera cu lo bo saca beneficio di e Santo Scritura door di les’e regularmente hunto cu e publicacionnan aki diseña pa studia Bijbel.