‘Contento cu Mi Educacion’

E HOBENSITA Kazuna a keda pasma ora cu su maestro a recomend’e pa e participa den un concurso di duna speech na Ingles. Tur scol secundario na Hokkaido, cu ta e isla grandi cu ta keda na e parti nort di Japon, tawatin mag di manda participante. Pero tawata e prome biaha cu Kazuna su scol a manda un alumno. Riba e dia di e concurso, Kazuna tawata nervioso pasobra tawatin mas o menos 50 otro participante. El a bira mas nervioso ainda ora el a ripara cu tawatin dos miembro di hurado kende nan idioma tawata Ingles.

Nan a anuncia ken tawata e ganadonan, cuminsando cu e premio mas abou bin ariba. Ora cu por ultimo nan a menciona Kazuna su nomber, el a keda babuca. E cu su maestro, kende tawata sinta banda di dje, a keda wak otro tur asombra. Kazuna, cu ainda tawata den shock, a subi riba podio y a haya su trofeo pa e prome premio!

Cu alegria Kazuna a splica: “Esaki tawata posibel solamente debi na e educacion cu Yehova su organisacion ta duna mediante e Scol di Ministerio Teocratico. Mi ta masha contento cu mi a ricibi e educacion aki.” E scol ei cu Kazuna ta participa den dje for di tempo cu e tawata chikito, ta un di e reunionnan di congregacion di Testigonan di Yehova. Pa prepara pa e concurso, Kazuna a paga tino specialmente riba uzo di microfon, papia cu sintimento, entusiasmo, uzo di gesto, contacto cu auditorio y otro puntonan mas cu ta ser trata den e Scol di Ministerio Teocratico.

Nos ta invita bo cordialmente pa bin wak con, tur siman, e scol aki ta ser teni na un di e Salonnan di Reino local di Testigonan di Yehova. Wak pa bo mes con tanto mucha chikito como hende grandi ta beneficia. E reunion ta pa un y tur. Pues, si bo ta desea di haya sa cua ta e scol mas serca di bo cas, tuma contacto cu Testigonan di Yehova den bo bicindario.