Ken Lo Alimenta Mundo?

SEGUN calculo di e Programa Mundial di Alimentacion, e organisacion di Nacionnan Uni cu ta lucha pa combati hamber, 800 miyon hende, mayoria di nan mucha, ta muriendo di hamber. Resientemente, e organisacion ei a bisa cu e recursonan y atencion cu hopi nacion desaroya lo por a dedica na e situacion aki ta ser absorba door di otro problemanan, manera entre otro terorismo. Anto e echo cu malesanan contagioso ta plamando a haci e problema bira piyo. Un raport (Global School Feeding Report) di e mesun organisacion ei a bisa encuanto paisnan Africano caminda tin masha hopi caso di AIDS: “Henter un generacion di mayor ta disparciendo. E yiunan cu nan ta laga atras hopi bes ta pa nan cuenta, y mayoria di nan no tin conocemento basico di agricultura ni di cosnan basico di bida cu normalmente ta pasa di un generacion pa otro.”

E Programa Mundial di Alimentacion tin un campaña cu e meta pa muchanan haya por lo menos un cuminda pa dia na scol. E idea no solamente ta pa mengua hamber sino tambe pa mediante scolnan introduci otro programanan specialmente pa preveni HIV/AIDS entre hobennan.

Caminda nan a implementa e programanan aki, muchanan a haya cuminda, instruccion encuanto higiena personal y otro tipo di yudansa. Tambe nan a ripara cu caminda hende a cambia nan conducta, casonan di infeccion di HIV/AIDS a baha.

Ta un lastima cu e resultadonan di e esfuersonan cu hende ta haci hopi bes ta solamente limita y insignificante. Pero Bijbel si ta duna un promesa alentador pa loke ta trata un solucion permanente pa e problema di hamber. Salmo 72:16 ta bisa: “Lo tin abundancia di maishi den e tera.” Bou di e Reino di Dios, hende lo por bisa di Yehova Dios: ‘Bo ta bishita tera y bo ta hacie masha rico mes; bo ta prepara nan maishi, pasobra asina bo ta prepara tera.’—Salmo 65:9.

[Reconocemento pa Potret na pagina 32]

WFP/Y. Yuge