Manera un “Sardio” Precioso

APOSTEL Huan a haya un vision di un trono glorioso den shelo. E aparencia di esun sinta riba e trono tawata “manera un piedra di yaspe.” Tambe e tawata manera un “sardio”, esta, un piedra precioso color cora. (Revelacion 4:2, 3) Ta di cua piedranan e ta papiando akinan?

Tawata trata aki di piedranan transparente. Antes aya, e palabra Griego pa “yaspe” tawata referi na piedranan di diferente color, incluso piedranan precioso cu tawata transparente. A. T. Robertson a bisa den e buki Word Pictures in the New Testament cu e “piedra di yaspe” di Revelacion 4:3, “sigur sigur no [tawata] nos yaspe barata di awendia.” Ademas, mas despues den e buki di Revelacion, Huan ta describi e stad celestial, Herusalem, bisando: “E tawata briya manera un piedra masha costoso, manera un piedra di yaspe, transparente manera cristal.” (Revelacion 21:10, 11) Aparentemente lus por a pasa door di e piedranan cu Huan ta referi na dje.

Den e vision di Huan, esun sinta riba e trono ta representa e Persona mas glorioso den universo, esta, Yehova Dios. E ta e persona mas puro y santo. Na harmonia cu esei, apostel Huan a skirbi: “Dios ta lus y den dje no tin nada-nada di scuridad.” (1 Huan 1:5) Pesei Huan a urgi su compañeronan den fe pa ‘purifica nan mes, mescos cu Yehova ta puro.’—1 Huan 3:3.

Kico nos mester haci pa nos por ta puro den Dios su bista? Ta sumamente importante pa nos tin fe den e sanger cu Cristo a drama pa pordon di nos picanan. Tambe nos mester sigui “cana den lus” door di studia Bijbel regularmente y biba na harmonia cu e siñansanan cu e ta contene.—1 Huan 1:7.