Yenando un Necesidad na Macedonia

“BIN Macedonia y yuda nos.” (Echonan 16:9) Esakinan ta palabranan di un homber cu a aparece den un vision na apostel Pablo. El a revela cu tawatin un necesidad pa declara e bon nobo di e Reino di Dios den un teritorio nobo, den e stadnan cu awor ta situa na Grecia.

Den e nacion actual di Macedonia, tin solamente 1 Testigo di Yehova pa cada 1.840 habitante. Masha poco hende a yega di tende di Yehova Dios. Si, tin un necesidad urgente pa hende di e nacion aki tende e mensahe di pas.—Mateo 24:14.

Dios a habri caminda pa yena e necesidad ei. Un dia den november 2003, e oficina di Testigonan di Yehova na Skopje, Macedonia, a ricibi un yamada inespera. E tawata di e Centro Macedonio pa Cooperacion Internacional, cu a invita e Testigonan pa pone un stand pa splica nan creencianan na un feria informativo di tres dia cu lo a cuminsa dia 20 di november. Esaki realmente tawata un gran oportunidad pa alcansa miles di hende cu nunca a tende e bon nobo di Reino!

Boluntarionan a traha diligentemente pa prepara un exhibicion di varios publicacion di Testigonan di Yehova na e idioma Macedonio. Nan a exhibi e literatura aki di tal manera cu e bishitantenan por a tuma ehemplarnan si nan a desea esei. E exhibicion a duna hopi hende e oportunidad pa tuma di e awa spiritual refrescante pornada.—Revelacion 22:17.

E bishitantenan tawata tuma specialmente publicacionnan cu tawatin di aber cu nan bida, tal como Loke hovenan sa puntra—Contesta práctica y E Secreto pa Felicidad den Famia.a Nobentiocho persona a duna nan adres y a pidi pa Testigonan di Yehova bishita nan. Hopi di nan a elogia e obra excelente di Testigonan di Yehova y e calidad di nan literatura.

Un homber a bini na e stand cu su yiu chikito na man. E tata a puntra si tawatin literatura pa mucha. E Testigonan a mustr’e e publicacion Mi buki di relato bíblico.b El a blader door di dje y tawata ansioso pa sa cuanto e ta costa. Ora el a tende cu e trabou di educacion di Testigonan di Yehova ta ser sosteni completamente door di donacion boluntario, el a bira mas ansioso ainda. (Mateo 10:8) El a mustra su yiu e buki y a bis’e: “Wak un buki bunita aki! Tur dia Papi lo lesa un historia for di dje pa bo!”

Un profesor di filosofia a bin na e stand. E tawata masha interesa den religion en general, pero specialmente den e creencianan di Testigonan di Yehova. Ora el a blader den e buki Hende en Busca di Dios,c e profesor a bisa: “E informacion aki ta presenta na un manera masha logico! Precis manera mi a imagina mi mes.” Mas despues, algun studiante di su scol a bin na e stand y a puntra si nan por haya nan propio ehemplar di e buki cu e profesor a tuma. Nan kier a studia e mesun buki. Nan a pensa cu lo e uza e informacion ei den su lesnan.

E exhibicion a duna algun hende nan prome oportunidad pa lesa y tende berdadnan di Bijbel. Un grupo di teenager sordo tambe a bin wak si tawatin algo interesante pa nan. Un di e Testigonan a combersa un rato cu nan cu yudansa di un mucha mohe cu a interpreta e combersacion den idioma di seña. Uzando e plachinan den e buki E homber mas importante cu hamás a biba,d el a splica nan cu Hesus a cura hende malo, incluso hende sordo. Nan a keda contento di “tende” e promesa biblico cu pronto Hesus lo haci mescos pa hende cu ta biba riba tera den nos tempo. Varios di nan a keda contento cu nan por a ricibi literatura basa riba Bijbel, y a haci areglo pa un Testigo cu sa idioma di seña bishita nan.

Fuera di literatura na Macedonio tawatin tambe literatura na Albanes, Ingles y Turco. Un homber cu no tawata papia Macedonio a pidi algun literatura na Ingles. Despues cu el a ricibi algun revista Toren di Vigilancia y Spierta! el a bisa cu e ta papia Turco. Ora e rumannan a mustr’e literatura den su mes idioma, casi e no por a kere su wowonan! El a compronde cu Testigonan di Yehova kier yuda tur hende.

E rumannan a duna un excelente testimonio na e ocasion ei, y tawata masha animante pa mira asina tanto hende mustra interes den e berdad di Bijbel. Si, Yehova a habri caminda pa mas hende por tende e bon nobo di Reino na Macedonia.

[Nota]

[Cuadro/Plachinan na pagina 9]

UN LOGRO SIGNIFICATIVO!

E esfuersonan pa predica e bon nobo di e Reino di Dios a haya un tremendo empuhe dia 17 di mei 2003. A dedica un oficina di Testigonan di Yehova na Skopje. A tuma dos aña pa completa e trabounan di construccion cu a haci e facilidadnan anterior cuater bes mas grandi.

Tin tres edificio separa cu ta consisti di oficinanan pa administracion y traduccion, e habitacionnan, un cushina y un labanderia. Guy Pierce, miembro di e Cuerpo Gobernante di Testigonan di Yehova, a duna e discurso di dedicacion. Tawatin bishitantenan di dies diferente pais na e programa di dedicacion. Nan tur a keda encanta y contento pa mira e bunita edificionan nobo aki.

[Mapa na pagina 8, 9]

(Pa e texto den su formato completo , wak e publicacion)

BULGARIA

MACEDONIA

Skopje

ALBANIA

GRECIA

[Plachi na pagina 8]

Skopje, Macedonia