Nan A Enfrenta Oposicion cu Curashi
UN MULTITUD di hende hostina a obliga Gayo y Aristarco, dos compañero di Pablo, drenta e teatro di Efeso. Einan e multitud a grita dos ora largo: “Grandi ta Artemis di e Efesionan!” (Echonan 19:28, 29, 34) Pablo su compañeronan a para firme ora nan a haya nan cu e oposicion aki? Kico a causa e situacion aki originalmente?
Pablo a predica cu exito den e stad di Efeso pa rond di tres aña. Como resultado di esei, hopi Efesio a stop di adora idolo. (Echonan 19:26; 20:31) E idolo tipico di Efeso tawata un tempel chikito di plata di Artemis, e diosa di fertilidad, kende su magnifico tempel a duna un bista riba henter e stad. E hendenan tawata bisti e imagennan chikito aki di e tempel como amulet of nan tawata pone nan den cas. Claro cu cristiannan no tawata cumpra e idolonan aki.—1 Huan 5:21.
Un di e platenan cu tawata yama Demetrio a sinti cu Pablo su ministerio tawata un menasa pa nan negoshi lucrativo. Door di papia mitar berdad y exagera cosnan, el a combence e otro artesanonan cu rond Asia Menor hende lo stop di adora Artemis. Ora e platenan furioso a cuminsa alaba Artemis na bos halto, a surgi un disturbio formal y henter e stad tawata den confusion.—Echonan 19:24-29.
Miles di hende a reuni na e teater cu tawatin asiento pa 25.000 persona. Pablo a ofrece su mes pa papia cu e multitud desordena, pero algun funcionario amigabel a combenc’e pa no hacie. Finalmente e secretario di stad a logra calma e multitud, y Gayo cu Aristarco a scapa ileso.—Echonan 19:35-41.
Awe e pueblo di Dios tambe por haya nan cu opositornan y asta lantamento segun cu nan ta cumpli cu nan ministerio. Hopi bes nan ta predica e bon nobo den stadnan caminda ta reina un ambiente di idolatria, inmoralidad y delincuencia. Apesar di esei, cu curashi nan ta imita apostel Pablo, kende ‘no a laga di siña publicamente y di cas pa cas’ den e stad di Efeso. (Echonan 20:20) Y nan tambe ta alegra ora nan ta mira cu ‘e palabra di Yehova ta sigui crece y prevalece.’—Echonan 19:20.
[Plachi na pagina 30]
Ruinanan di e teatro na Efeso