“Nan No A Compromete Nan Fe”

“BENDICIONA boso ta ora cu hende insulta boso y persigui boso, y ta gaña tur clase di maldad riba boso pa mi causa”, Hesucristo a bisa su disipelnan. (Mateo 5:11) Testigonan di Yehova djawe ta felis pasobra, na harmonia cu Cristo su siñansa y ehempel, nan ta percura pa ‘no ta parti di mundo’, nan ta keda strictamente neutral den asuntonan politico y ta mantene integridad na Dios bou di tur clase di circunstancia.—Huan 17:14; Mateo 4:8-10.

Relaciona cu e posicion firme cu Testigonan di Yehova a tuma na ex Union Sovietico, cu a inclui e Testigonan na Estonia, Toomas Paul, un teologo luterano y traductor di Bijbel, a skirbi den su buki Kirik keset küla (E Kerki Meimei di e Pueblito): “Masha poco hende a yega di tende loke a pasa den e oranan tempran di mainta di 1 di april 1951. [Autoridadnan] a plania un campaña pa deshaci di Testigonan di Yehova y di tur hende cu tawata asocia cu nan; en total nan a captura y deporta 279 persona pa Siberia ... A duna nan un chens di firma un formulario den cua nan ta renuncia nan fe y asina evita deportacion of encarselacion ... Hunto cu esnan aresta anteriormente, tawatin 353 persona cu a keda interna, incluso por lo menos 171 persona cu tawata djis asocia cu nan congregacionnan. Nan no a compromete nan fe, ni sikiera na Siberia ... No tawatin hopi miembro di Iglesia [Luterano di Estonia] cu un fe manera di Testigonan di Yehova.”

Testigonan di Yehova rond mundo tin e confiansa cu Dios ta yuda nan keda fiel y obediente na dje apesar di persecucion. Nan ta contento pasobra nan sa cu e recompensa pa nan fieldad ta grandi.—Mateo 5:12.