“Esnan Cu Ta Baha Bai Lama den Barco”

UN ESTATUA di brons di un piscado na timon, tratando pa stuur su barco den un tormenta, ta para cu cara pa e haf di Gloucester, Massachusetts, Merca. E estatua ta un conmemoracion di e miles di piscadonan di Gloucester cu, segun informenan, a muri riba lama. Na pia di e estatua y riba un plakkaat banda di dje tin e palabranan di Salmo 107:23 y 24: “Esnan cu ta baha bai lama den barco, cu ta haci negoshi riba awanan grandi, eseinan ta mira e obranan di SEÑOR, y su maraviyanan den e profundidad.”

Piscamento riba e cainan [areanan rico na pisca] den Oceano Atlantico ta un negoshi peligroso. Segun informe, atrabes di añanan 5.368 hende homber di Gloucester, cu awor tin un poblacion di rond di 30.000 hende, a perde nan bida ora nan tawata pisca riba lama. E plakkaat conmemorativo ta bisa: “Algun a wordo sorprendi pa e bientonan feros y olanan inmenso di un tormenta catastrofico for di nortost. Otronan a haya nan morto ora nan tawata nan so den un boto chikito cu a perde for di e golet [barco di bela di dos mast] cu a hiba nan na e cainan. Algun boto a dal den otro durante tormenta y a sink, cu resultado tragico. Tin boto cu a dal den otro barco cu tawata crusando y bai fondo di lama.”

E estatua ta para como un testigo tristo di e afan y peligernan cu piscadonan a pasa aden pa hopi siglo. Imagina e lagrimanan di desesperacion drama pa esposo-, tata-, ruman- y yiunan perdi. Pero Yehova Dios no ta lubida e biudanan, e huerfanonan of esnan cu a perde nan bida riba lama. Apostel Huan a señala na e futuro desaroyo aki: “Lama a entrega e mortonan cu tawata den dje, y morto y Hades a entrega e mortonan cu tawata den nan.” (Revelacion 20:13) Ora e personanan cu a “baha bai lama den barco” wordo resusita, en berdad nan lo mira e maraviyoso “obranan di SEÑOR.”