Bo Kier Tin Bon Amigo?

MAYORIA hende kier tin bon amigo. Bida ta mas dushi ora bo por comparti bo experencianan cu bo amigonan intimo. Pero con bo por haya un bon amigo? Casi 2.000 aña pasa, Hesus a mustra cu e clave pa exito den tur relacion humano ta amor sin egoismo. El a bisa: “Mescos cu boso kier pa hende haci cu boso, boso tambe haci cu nan.” (Lucas 6:31) E declaracion aki, hopi bes yama e Regla di Oro, ta mustra cu pa bo tin amigo bo mester ta un persona sin egoismo y generoso. Basicamente, pa bo tin un amigo, bo mes mester ta un amigo. Con asina?

Bo no por cultiva un amistad intimo y caluroso di un dia pa otro. Al fin y al cabo, un amigo ta mucho mas cu un conoci. E ta un persona cu bo ta pega na bo curason, y pa bo desaroya y mantene lasonan estrecho bo tin cu haci esfuerso. Hopi bes, amistad ta exigi pa bo pone e necesidadnan di bo amigo prome cu bo interesnan. Amigo ta comparti no solamente nan experencianan agradabel sino tambe esnan desagradabel.

Bo ta mustra cu bo ta un berdadero amigo specialmente door di duna sosten emocional y practico na un persona den necesidad. Proverbionan 17:17 ta declara: “Un amigo ta stima tur ora bai, y un ruman ta naci pa tempo di adversidad.” De echo, lasonan di amistad por ta asta mas fuerte cu cierto relacionnan di famia. Proverbionan 18:24 ta remarca: “Un hende cu tin hopi amigo por yega na ruina, ma tin un amigo cu ta mas pega cu un ruman.” Bo kier sa mas tocante con bo por cultiva berdadero amistad? Lo bo kier forma parti di un grupo di hende cu ta conoci pa e amor cu nan tin pa otro? (Huan 13:35) Si ta asina, Testigonan di Yehova den bo comunidad lo ta contento pa mustra bo con bo por haya berdadero amigo.