Un Bishita Cu A Causa un Cambio Total

“MI TABATA ansioso pa conta mi famia tocante e dos ‘angelnan’ cu Dios a manda cerca mi.” Asina un cabayero cu a haya bishita di dos mucha muher Testigo di Jehova a skirbi. Un par di siman prome cu nan bishita, su esposa a muri despues cu nan tabatin 45 aña casa. E homber a keda destrosa. Su yiunan adulto a dun’e consuelo, pero nan tabata biba basta leu. Ningun amigo ni bisiña no a bin bishit’e.

“Mi no ta papia cu Dios”, e homber a bisa e hobennan ora nan a bishit’e. Sinembargo, nan a demostra comprension, y a lag’e cu un tratado biblico titula Ki speranza tin pa stimánan cu a fayece? El a les’e e anochi ei y a haya consuelo.

Poco tempo despues, e dos mucha muhernan cristian a bai bek. Nan a keda corda con tristo e tabata durante e bishita anterior y nan a pasa pa wak con a sigui cu ne. Despues e homber a skirbi: “M’a keda babuca cu dos persona totalmente desconoci tabata interesa den mi y tabata precupa pa mi bienestar.” E palabranan cu nan a comparti cu ne for di Bijbel a anim’e. E mucha muhernan a bis’e cu nan lo bolbe pasa. E cabayero a keda hopi contento y a sinti e conmovi pa skirbi e comentarionan menciona ariba den un carta cu el a manda pa e Salon di Reino local di Testigonan di Jehova.

Prome cu e cabayero aki a muda pa un luga cu ta keda mas cerca di un di su yiunan, el a asisti na un reunion cristian di Testigonan di Jehova y a bai come cerca famia di un di e mucha muhernan. El a skirbi: “Mi ta bai for di e area aki, pero e hobennan ei y boso iglesia semper lo tin un luga den mi curason y den mi oracionnan. Si, awor mi ta haci oracion, anto hopi. Mi a haci un cambio total. E hobennan ei a hunga un papel importante den esei, y lo mi ta semper gradicido na nan.”