Su Delicia Tabata den e Lei di Jehova

ALBERT D. SCHROEDER, miembro di e Cuerpo Gobernante di Testigonan di Jehova, a termina su bida riba tera riba diaranson, 8 di maart 2006. E tabatin 94 aña di edad y a dedica mas cu 73 aña den e sirbishi di tempo completo.

Ruman Schroeder a nace na Saginaw, Michigan, Merca, na 1911.a Como mucha, el a siña hopi cos di Bijbel for di su wela part’i mama, kende a inculca den dje tambe un amor pa lesa e Palabra di Jehova. El a studia Latin, Aleman y elektrotechniek na Universidad di Michigan. Sinembargo, segun cu su aprecio pa e Scritura a crece, el a laga su estudio universitario para pa drenta den e trabou di predica e Reino tempo completo. Na 1932 el a bira miembro di e famia di Betel na Brooklyn, New York.

Na 1937, tempo cu Ruman Schroeder tabatin 26 aña di edad, el a ser nombra pa supervisa e obra di Testigonan di Jehova na Gran Bretania. Su celo pa e trabou di predica a anima hopi ruman einan pa drenta den sirbishi di tempo completo. Un di e yoncumannan cu e tabatin hopi contacto cu ne na e Betel di London tabata John E. Barr. Despues nan a sirbi hunto pa hopi aña den e Cuerpo Gobernante.

Durante e añanan di guera, autoridadnan a tuma nota di Ruman Schroeder su labornan na fabor di Testigonan di Jehova. Na augustus 1942 el a ser deporta for di Gran Bretania. Despues di a crusa Ocean Atlantico durante un biahe angustioso den tempo di guera, el a yega Brooklyn bek na september.

E tempo ei, Jehova su sirbidornan tabata anticipando caba cu un gran trabou lo mester a tuma luga despues di Segundo Guera Mundial. Ruman Schroeder a haya un grato sorpresa ora el a ricibi su siguiente asignacion: yuda desaroya e programa di estudio pa e Scol Biblico di Galaad di Watchtower. Pa algun aña el a sirbi einan como instructor, y a yuda entrena misionero. Studiantenan cu a haya les cerca dje na Galaad y despues den e Scol di Ministerio di Reino tin grato recuerdo di su lesnan. E tabatin delicia den inculca amor pa e leinan di Dios den su studiantenan y semper el a enfatisa e importancia di conoce Jehova.

Na 1956, Ruman Schroeder a casa cu Charlotte Bowin, y na 1958 nan yiu, Judah Ben, a nace. Ruman Schroeder tabata un bon esposo y tata cristian. Na 1974 el a cuminsa sirbi den e Cuerpo Gobernante, caminda su perspicasia a ser aprecia masha tanto. E tabata un homber bondadoso y humilde kende, riba tur cos, kier a engrandece e nomber precioso di Dios. Nos tin tur confiansa cu Ruman Schroeder a ricibi su recompensa celestial como un cristian ungi kende en berdad ‘tabatin delicia den e lei di Jehova.’—Salmo 1:2.

[Nota]