Disfruta di Nos Bunita Tera

ASTRONOMONAN a constata cu e hogar di humanidad ta djis un punta hopi chikito asina den e espacio inmenso di un universo sin limite. Ningun otro caminda den e universo fisico nan a haya bida. Ta riba planeta Tera so tin e condicionnan ideal pa bida.

Es mas, nos por disfruta di bida riba e bunita planeta aki. Esta dushi ta pa sinti e cayente di solo riba un dia friu! Cua di nos no ta keda impresiona cu un salida of bahada di solo espectacular? Claro cu nos solo ta haci mas cu simplemente deleita nos sentidonan. E ta sumamente importante pa nos existencia.

Durante miles di miyones di aña, e forsa di gravedad (zwaartekracht) di solo a tene e Tera y otro planetanan den nan orbita stabil. Anto, manera muchanan ta siña na scol, henter e sistema solar ta move den un orbita rond di e centro di nos galaxia cu yama Via Lactea. Pero solo ta apenas un di e mas cu 100 mil miyon streyanan cu ta moviendo hunto den nos galaxia.

Forsa di gravedad ta tene e galaxia Via Lactea den un troshi di mas o menos 35 galaxia. Tin troshinan mas grandi cu ta contene miles di galaxia. Nos sistema solar probablemente lo no tabata asina stabil si e tabata forma parti di un troshi mas grandi cu mas tanto galaxia. Pero, manera e situacion ta, masha tiki region di universo “ta asina apto pa e forma di bida compleho manera di nos”, segun un declaracion di Guillermo Gonzalez y Jay W. Richards den nan buki The Privileged Planet (E Planeta Privilegia).

Acaso e existencia di bida riba e planeta aki ta producto di puro casualidad, e resultado accidental di un parti di e “big bang”, e gran explosion cu a tuma luga na comienso di universo? Of bida riba e bunita planeta Tera aki tin un nificacion mas grandi?

Hopi hende a yega na e conclusion cu nos hogar terenal tabata specificamente diseña pa sostene bida.a Siglonan pasa, un profeta Hebreo a hala atencion na Tera y shelo. El a skirbi: “Ora mi contempla bo shelonan, e obra di bo dedenan, e luna y e streyanan cu abo a establece, ta kico hende ta?” (Salmo 8:3, 4) E poeta aki tabata combenci cu mester tin un Creador. Esei ta un conclusion rasonabel den e era cientifico aki?

[Nota]

[Cuadro/​Plachi na pagina 3]

“For di un distancia, Tera ta briya manera un hoya blou den e scuridad di espacio”, segun e buki The Illustrated Science Encyclopedia—Amazing Planet Earth.

[Reconocemento]

Globo: U.S. Fish & Wildlife Service, Washington, D.C./NASA