Un Ehempel di Honestidad

NELMA, kende ta traha como pelukera na Cruzeiro do Sul, Brazil, recientemente a confronta un test di su integridad cristian. Despues cu inundacion a asota su area, el a haya algun paña cerca un di su clientenan. Segun cu Nelma tabata sortia e pañanan, el a haya placa na balor di 1.800 florin Arubiano den saco di algun carson.

E placa cu Nelma a haya tabata e ekivalente di shete luna di trabou, y e tabatin echt mester di placa. Su propio cas a sufri daño debi na e inundacion, y su tata y su rumannan a perde casi tur cos. Cu e placa cu el a haya lo e por a caba di drecha su cas y te asta sobra cen pa yuda su famia. Sinembargo, Nelma su consenshi biblicamente entrena no a permitie keda cu e placa.—Hebreonan 13:18, NW.

E siguiente mainta tempran el a bai trabou prome cu e negoshi habri y a tuma contacto cu e señora comerciante cu a dun’e e pañanan. Nelma a gradicie pa e pañanan pero a agrega cu e no por a keda cu loke el a haya den e saco di carsonnan. E señora a keda sumamente contento di haya e placa bek. Tabata cen cu el a pone un banda pa paga su trahadonan. E señora comerciante a bisa: “Honestidad ta algo cu bo no ta haya hopi.”

Si, tin hende ta haya cu ser honesto no tin ningun balor special. Sinembargo, pa e hendenan cu ta haci esfuerso pa agrada e Dios berdadero, Jehova, honestidad ta un cualidad cu nan ta balora masha. (Efesionan 4:25, 28) Nelma a bisa: “Lo mi no por a drumi anochi si mi a actua di otro manera.”