En Busca di Contesta

“Casi tur hende tin nan mes teoria tocante ken [Hesucristo] ta. Sea cu nos tin fe of no, ta yega e momento cu nos tur lo puntra nos mes, ‘Ken e homber aki ta?’”​—ESCRITOR STAN GUTHRIE.

HOPI hende kier sa mas di Hesus. Buki- y peliculanan cu ta trata e bida di Hesus a bira masha popular. No obstante, ainda hopi hende tin pregunta tocante Hesus y diferente opinion encuanto ken e tabata realmente.

Algun aña pasa, dos periodista a pone un pregunta tocante Hesus riba Internet pa hende por a duna nan opinion. Nan a puntra: “Ken Hesus tabata?” Esaki ta loke algun hende a contesta:

● “Aparentemente e tabata un rabi (maestro) cu a pone un ehempel den mustra compasion.”

● “E tabata un homber simpel pero cu a hiba un bida extraordinario.”

● “No tin prueba cu Hesus a existi.”

●“Hesus ta e Yiu di Dios kende a nace, muri y lanta for di morto pa libra nos di pica. E ta na bida awe, y lo e bolbe na tera.”

● “Ami ta kere cu Hesucristo ta e unico yiu di Dios. E ta hende, pero na mes momento e ta dios.”

● “Hesus ta un figura den cuenta di hada pa mucha grandi.”

Claro cu tur e diferente puntonan di bista aki no por ta basa riba realidad. Awor, tin un solo fuente di informacion confiabel cu por duna nos contesta convencente pa e preguntanan cu nos tin tocante Hesus? E editornan di e revista aki ta kere cu Bijbel ta e Palabra di Dios y cu ta via Bijbel so nos por haya sa e berdad completo tocante Hesus.a​—2 Timoteo 3:16.

Den e siguiente articulo nos lo wak con Bijbel ta contesta algun pregunta cu hopi hende sa haci tocante Hesus. Hesus mes a bisa cu e caminda pa salbacion ta habri pa “tur cu pone fe den dje.” (Juan 3:16) Nos ta anima bo pa analisa e contestanan y dicidi pa bo mes si bo tin cu siña mas tocante Hesus y tambe con pa pone fe den dje.

[Nota]