Su Profecianan Semper A Cumpli
“Ni un palabra di tur e bon palabranan cu SEÑOR boso Dios a papia tocante di boso no a faya.”—JOSUE 23:14.
DICON BIJBEL TA DISTINTO? Loke hende a yega di pronostica den pasado sin yudansa di Dios tabata ambiguo y inconfiabel, y e horoscopnan di awendia no ta mihor. Ademas, personanan cu ta pronostica futuro a base di desaroyonan actual masha poco ta purba di profetisa sucesonan specifico siglonan adelanta. Na contraste cu esey, Bijbel su profecianan ta detaya y semper ta cumpli maske nan a ser profetisa “for di temponan antiguo.”—Isaias 46:10.
UN EHEMPEL: Den siglo 6 prome cu nos era, profeta Daniel a haya un vision cu a mustra cu Grecia lo a derota Medopersia den un lapso di tempo masha cortico. Ademas, e vision a mustra cu e reinado di e rey victorioso di Grecia lo a “kibra”, of yega na su fin, asina cu e rey “bira poderoso.” Anto ken lo a reemplasa e rey aki? Daniel a skirbi: ‘Cuater reino lo lanta for di su nacion, ma no cu su poder.’—Daniel 8:5-8, 20-22.
LOKE HISTORIA TA MUSTRA: Mas cu 200 aña despues di e tempo di Daniel, Alehandro e Grandi a bira rey di Grecia. Y den solamente dies aña, el a derota e Imperio di Medopersia y a extende e Imperio Griego te na Riu Indo (cu ta situa den e pais cu awe ta Pakistan). Pero diripiente, Alehandro a muri na edad di 32 aña. Despues, su generalnan a bringa cu otro na Ipso na Asia Menor pa teritorio, y e cuaternan cu a gana e bataya a parti e Imperio Griego entre nan. Pero, ningun di nan no a bira poderoso manera Alehandro.
KICO ABO TA PENSA? Tin un otro buki di cua nos por bisa cu su profecianan semper a cumpli? Of Bijbel ta e unico?
‘Bijbel ta contene asina tanto profecia cu a cumpli caba cu ta casi imposibel cu un hende por kere cu ta pa casualidad nan a cumpli.’—A LAWYER EXAMINES THE BIBLE, DI IRWIN H. LINTON