“Mi A Cuminsa Pensa Seriamente Con Lo Para cu Mi Bida”

MI PASADO:

Mi a lanta na Warialda, New South Wales. Warialda ta un pueblito cu hopi cunucu caminda nan ta cria carne y baca, y ta planta grano y berdura. E pueblo ta limpi y cu masha poco criminalidad.

Mi ta e yiu mayo di un famia di dies yiu. Ora mi tabatin 13 aña, mi a cuminsa traha pa yuda mi famia. Como cu mi no tabatin hopi scol, mi tabata traha den cunucu. Ora mi tabatin 15 aña di edad, mi tabata cuida bestia y mansa cabay.

E echo cu mi tabata traha den cunucu tabatin su banda bon y su banda malo. Di un banda, mi a gusta tanto e trabou como e ambiente. Mi tabatin custumber di sinta pafo anochi banda di un kampvuur y tabata wak e luna y e cielo yen di strea. Y tambe mi tabata disfruta di e aire fresco y e holo agradabel di mondi. Esaki a pone mi pensa cu mester tin un Persona cu a crea tur e cosnan maraviyoso ey. Di otro banda, algun hende cu mi tabata traha cu ne tabatin un mal influencia riba mi. Hopi biaha nan tabata papia palabra malo y tabata huma hopi sigaria. Pesey, no a dura mucho cu ami tambe a cuminsa huma y papia palabra malo.

Ora mi a cumpli 18 aña, mi a muda bay e stad Sydney. Mi a purba drenta servicio militar, pero nan no a acepta mi pasobra mi no tabatin hopi scol. Mi a haya un trabou y a keda biba un aña na Sydney. Ta durante e periodo ey mi a topa cu Testigonan di Jehova pa prome biaha. Mi a acepta un invitacion pa bay un di nan reunionnan, y di biaha mi a mira cu nan siñansanan ta basa riba Bijbel.

Pero poco tempo despues, mi a dicidi di bay biba bek den cunucu. Y finalmente mi a keda biba na e pueblo Goondiwindi, Queensland. Mi a haya un trabou, y mi a casa. Pero lamentablemente, mi a cuminsa bebe tambe.

Ami cu mi esposa a haya dos yiu homber. Despues cu nan a nace, mi a cuminsa pensa seriamente con lo para cu mi bida. Mi a corda loke mi a tende na e reunion di e Testigonan na Sydney, y mi a dicidi cu mi tin cu haci cambio.

Mi a haya un edicion bieu di E Toren di Vigilancia cu e adres di e sucursal di Testigonan di Jehova na Australia. Mi a skirbi nan un carta pa pidi yudansa. Y nan a manda un Testigo amabel y cariñoso pa bin bishita mi. Un poco despues, el a cuminsa duna mi les di Bijbel.

BIJBEL A CAMBIA MI BIDA:

Segun cu mi tabata studia Bijbel, mi a bin compronde cu mi mester haci cambionan grandi den mi bida. Un texto di Bijbel cu a haci un impacto riba mi tabata 2 Corintionan 7:1. E texto ey ta anima nos pa “limpia nos mes di tur impureza di carni.”

Mi a dicidi di stop di huma y di bebe di mas. No tabata facil pa mi haci cambio, pasobra pa hopi tempo e bicionan ey tabata un parti di mi bida. Pero, mi tabata determina pa hiba un bida cu ta agrada Dios. Loke a yuda mi tabata e principio biblico na Romanonan 12:2 cu ta bisa: “Stop di laga e mundo aki forma boso, ma transforma boso mes door di renoba boso mente.” Mi a realisa cu si mi kier stop cu e bicionan ey, mi mester cambia mi manera di pensa y cuminsa mira e cosnan ey manera Dios ta mira nan, esta, como algo hopi dañino. Cu Dios su yudansa mi a logra stop di huma y di bebe di mas.

Pero, loke mi a haya mas dificil ainda tabata pa stop di papia palabra malo. Mi tabata sa cu Bijbel ta conseha na Efesionan 4:29 pa “no laga ningun palabra putri sali for di boso boca.” Toch, no ta mesora mi a logra stop di papia palabra malo. Loke a yuda mi ta ora mi a medita riba e palabranan di Isaias 40:26 cu ta papia di e cielo yen di strea. E texto ta bisa: “Hisa bo wowo wak ariba y mira ta ken a crea e streanan aki; Esun cu ta guia nan ehercito segun nan cantidad, ta e ta yama nan tur na nan nomber; pa motibo di e grandeza di su forsa y su poder ningun di nan no ta falta.” Mi a pensa cu si Dios tin asina tanto poder cu e por a crea e universo inmenso, cu mi tabata gusta contempla, e lo mester por duna mi forsa pa haci cambio den mi bida pa mi por agrad’e. Cu hopi oracion y esfuerso, gradualmente mi a logra stop di papia palabra malo.

E BENEFICIONAN:

Como un cuidado di bestia, mi no tabatin hopi oportunidad di combersa cu hende pasobra tabatin masha poco hende ta biba caminda mi tabata traha. Pero, e entrenamento cu mi a haya na e reunionnan di Testigonan di Jehova a siña mi con pa papia. Por ehempel, esey a yuda mi pa papia di e bon noticia di e Reino di Dios cu otro hende.—Mateo 6:9, 10; 24:14.

Durante e ultimo añanan, mi a sirbi como anciano den congregacion y pa mi ta un privilegio pa haci tur loke ta na mi alcance pa yuda mi rumannan den fe.

Mi ta agradecido cu Jehova a instrui mi aunke mi no tabatin hopi scol. (Isaias 54:13) Y mi ta completamente di acuerdo cu loke Proverbionan 10:22 ta bisa: “Ta e bendicion di SEÑOR ta haci rico.”