TOPICO PRINCIPAL | DI BERDAD DIABEL TA EXISTI?
Di Berdad Diabel Ta Existi?
Un estatua di Satanas, como un di e angelnan malbado, saca for di cielo (Madrid, Spaña)
“Tempo mi tabata chikito, mi a kere den Dios, pero no den Diabel. Ora mi haci cos di mala mucha, mi mama tabata bisa mi: ‘Diabel ta bin y bay cu bo!’ Y mi tabata contest’e: ‘Lag’e bin!’”—ROGELIO, EL SALVADOR.
Abo tambe ta pensa mescos cu Rogelio? Segun bo, cua di e siguiente opinionnan ta mas logico?
Diabel no ta existi; e ta djis un simbolo di maldad.
Diabel ta existi, pero e no tin interes den hende.
Diabel ta un ser spiritual poderoso cu tin hopi influencia riba hende.
Tin miyones di hende cu ta kere den un of mas di e opinionnan aki. Pero ta importa cua di nan ta corecto? Wel, si Satanas e Diabel no ta existi, e ora ey e personanan cu ta kere den dje a ser engaña. Si Satanas ta existi pero no tin interes den hende, e ora ey hopi hende ta preocupa innecesariamente of hasta tin miedo di dje pornada. Pero, si Satanas ta existi y ta trata di manipula nos, e ora ey e ta mas peligroso cu hopi hende ta imagina.
Laga nos wak con e Santo Scritura ta contesta e preguntanan aki: Diabel ta existi di berdad, of e ta djis un simbolo di maldad? Si e ta un persona real, e por haci bo daño? Y si ta asina, con bo por proteha bo mes?