PREGUNTA DI LECTOR

Ki prueba tin cu no a tuma mucho tempo pa conkista e ciudad antiguo di Jerico?

Di acuerdo cu Josue 6:10 te cu 15 y 20, e ehercito Israelita a marcha un biaha pa dia pa seis dia largo rond di Jerico. Riba e di shete dia, nan a marcha shete biaha rond di e stad, y Dios a basha e murayanan masivo di Jerico abou. Asina e Israelitanan por a drenta Jerico y conkist’e. Bijbel ta bisa cu no a tuma mucho tempo pa conkista Jerico. Tin pruebanan arkeologico cu ta comproba esaki?

Den temponan antiguo, tabata comun pa un ehercito rondona stadnan fortifica pa ataca nan. Si esey a dura hopi, e hendenan den e stad lo a come gran parti di e cuminda cu nan tabatin warda. Ora cu finalmente e soldaatnan conkista e stad, nan tabata bay cu tur loke nan tabata kier, hasta e cuminda cu a resta. Pero den e ruinanan di Jerico, arkeologonan a haya un cantidad grandi di cuminda. Encuanto esaki, e revista Biblical Archaeology Review a bisa: “Ademas di pochinan di klei, loke mas nan a haya den e ruinanan tabata grano ... Esaki ta algo unico pasobra nunca den historia e arkeologonan a yega di mira algo asina na Palestina. Nan a yega di haya un of dos tinashi, pero nunca un cantidad asina grandi di grano.”

Di acuerdo cu e relato biblico, e Israelitanan tabatin bon motibo pa no bay cu e grano di Jerico. Jehova a bisa nan pa no haci esey. (Jos. 6:17, 18) E Israelitanan a ataca durante lente, net despues di tempo di cosecha ora tabatin hopi grano. (Jos. 3:15-17; 5:10) E echo cu nan a haya hopi grano na Jerico ta indica cu e conkista no a dura mucho largo, net manera Bijbel ta bisa.