TOPICO PRINCIPAL | KICO TA E MIHOR REGALO CU BO POR HAYA?
E Buskeda pa e Mihor Regalo
No ta facil pa haya sa kico bo mester regala un otro hende. Pasobra ta e hende cu ta ricibi e regalo ta dicidi si e regalo ta bon p’e. Y loke un hende ta haya bon, e otro hende kisas no ta haya bon.
Por ehempel, un teenager por haya cu ta e ultimo modelo di un aparato electronico ta e mihor regalo p’e. Di otro banda, un adulto ta aprecia un regalo cu tin balor sentimental, por ehempel un herencia di famia. Ademas, den algun cultura, tanto hoben como adulto gusta haya placa como regalo, pasobra nan por uza esey manera nan ta desea.
A pesar di e retonan ey, hopi hende ta sigui cu nan buskeda pa haya e mihor regalo pa e persona cu nan ta aprecia. Aunke no ta semper facil pa haya e mihor regalo pa un otro hende, tin algun factor cu por yuda nos haya exito den nos buskeda. Laga nos analisa cuater di nan cu por yuda nos duna e mihor regalo.
E deseo di e persona cu ta haya e regalo. Un homber na Belfast, Noord Irlanda, a bisa cu e bais di careda cu nan a regal’e tempo e tabatin 10 of 11 aña tabata e mihor regalo cu el a yega di haya. Dicon? E ta splica: “Pasobra e bais ey tabata algo cu echt mi tabata kier.” Su contesta ta mustra cu ta e deseo di un hende ta loke ta haci un regalo bon p’e. Pues pensa riba e hende cu bo kier duna un regalo. Purba di saca afo kico e tin gana di haya, pasobra loke un hende ta gusta hopi biaha ta influencia su deseonan. Por ehempel, welanan hopi biaha ta gusta pasa tempo hunto cu nan famia. Nan lo kier mira nan yiu- y nietonan mas tanto posibel. Kisas un vakantie cu famia ta loke nan lo gusta mas cu cualkier otro regalo.
Un manera pa haya sa kico ta un hende su deseo ta ora nos ta pone bon atencion na loke e ta bisa. Bijbel ta anima nos pa “ta cla pa scucha” y “slow pa papia.” (Santiago 1:19) Ora bo ta combersa cu bo amigo- of famianan, scucha bon pa bo haya sa kico nan ta gusta y kico nan no ta gusta. Ta bira mas facil e ora ey pa bo duna nan un regalo cu nan lo gusta.
E necesidad di e persona cu ta haya e regalo. Un hende por balora un regalo hasta si e ta chikito of barata con tal cu e ta util p’e. Pero con nos por sa kico un otro persona tin mester?
E manera di mas facil pa haya sa esey ta door di puntra e persona kico e tin mester di dje of kico e kier haya. Sinembargo, pa hopi hende cu ta duna regalo, esey lo kita e goso cu un hende ta haya ora di duna regalo. Nan lo prefera di duna e hende e mihor regalo como sorpresa. Ademas, mientras cu tin hende ta papia abiertamente di loke nan ta gusta y no ta gusta, tin otro hende cu ta mas reserva y no ta papia dje hopi ey tocante loke nan mester.
Pesey, observa bon y tuma bon nota di e hende su circunstancianan. E ta jong, e ta di edad, soltero, casa, divorcia, viuda, sin trabou of pensionado? Despues, pensa ki tipo di regalo por ta util pa e hende ey.
Pa nos haya sa kico e persona mester di dje, nos por papia cu otro hende cu tabata den un situacion similar. Kisas nan por bisa nos di algun necesidad cu otro hende no sa di dje. Cu e informacion aki, nos lo por duna un regalo cu ta satisface un necesidad cu otro hende no a pensa riba dje.
E momento apropia pa duna e regalo. Bijbel ta bisa: “Ki bon ta un palabra duna na ora.” (Proverbionan 15:23) E texto aki ta mustra cu ta importante pa scoge e momento apropia pa papia. Esey ta conta tambe pa nos accionnan. Mescos cu un palabra papia na e momento apropia por laga e persona sintie bon, asina tambe un regalo duna na e momento apropia por haci e persona contento.
Un amigo ta bay casa. Un hoben ta bay gradua. Un pareha casa ta bay haya yiu. Eseynan ta djis algun ocasion cu hende sa duna regalo. Algun hende ta haya cu ta practico pa tin un lista di ocasion special cu lo tuma luga durante aña. Asina nan por plania ki regalo nan ta bay duna den cada caso.a
Ta claro cu no ta na ocasionnan special so nos por duna regalo. Nos por experencia e goso di duna regalo na cualkier momento. Sinembargo, nos mester tene cuidou. Por ehempel, si un hende homber duna un hende muher un regalo sin niun motibo, e hende muher por pensa cu e regalo ta nifica cu e hende homber tin interes den dje y cu e kier conoc’e mas mihor. Pero si esey no ta e intencion, un regalo asina por hiba na mal comprondemento of problema. Esey ta un bon motibo anto pakico nos mester analisa un otro factor importante, esta, e motivacion di e hende cu ta duna regalo.
E motivacion di e persona cu ta duna e regalo. Manera e ehempel anterior a mustra, ta bon pa esun cu ta duna e regalo puntra su mes si esun cu ta ricibi e regalo tin chens di malinterpreta su intencionnan. Di otro banda, ta bon pa esun cu ta bay duna e regalo analisa su propio motivacion. Aunke hopi hende ta kere cu nan motibo pa duna regalo ta bon, nan ta duna regalo den cierto temporada di aña pasobra nan ta sinti nan presiona pa haci esey. Di otro banda, tin hende cu ta duna regalo pa haya un trato special of pa haya algo a cambio.
Kico nos por haci pa nos ta sigur cu nos tin e motivacion corecto ora di duna regalo? Bijbel ta bisa: “Laga tur boso asuntonan tuma luga cu amor.” (1 Corintionan 16:14) Si nos duna un regalo cu amor y cu interes sincero, esun cu lo ricibi nos regalo lo tin goso, y nos lo ta feliz pasobra nos a demostra berdadero generosidad. Ora nos ta duna di curason, nos lo haci nos Tata celestial contento. Apostel Pablo a elogia e cristiannan di e stad antiguo di Corinto ora cu na un manera generoso y gososo nan a apoya y yuda nan rumannan na Judea. Pablo a bisa nan: “Dios ta stima hende cu ta duna cu alegria.”—2 Corintionan 9:7.
Ora nos tene cuenta cu e factornan cu nos a analisa, esey por yuda nos duna hende regalo cu lo duna nan berdadero goso. Dios a tene cuenta cu e factornan aki y otro cosnan pa duna humanidad e mihor regalo cu ta existi. Lo bo haya sa kico e regalo aki ta ora bo lesa e siguiente articulo.
a Hopi hende ta duna regalo pa hacimento di aña y riba dianan di fiesta. Pero e ocasionnan ey tin di haber cu practicanan cu ta bay contra siñansanan di Bijbel. Wak e articulo “Nos Lectornan Ta Puntra: Pasco Ta un Celebracion pa Cristian?” den e revista aki.