Mustra Cautela den Sirbishi
1. Dicon nos mester ta cauteloso den sirbishi?
1 “Manera carne meymey di lobo”, asina Dios su sirbidornan ta predica “meymey di un generacion troci y perverso.” (Mat. 10:16; Flp. 2:15) Tur dia nos ta tende informenan alarmante di manifestacion civil, multitud violento y secuestronan cruel cu ta proba cu hende malbado ta bayendo “di malo pa pio.” (2 Tim. 3:13) Pesey, ki principio biblico por yuda nos mira e importancia pa ta “cauteloso” den sirbishi?—Mat. 10:16.
2. Ki circunstancianan por pone cu nos tin cu sali for di un teritorio y bay traha un otro caminda?
2 Sea Prudente: Proverbionan 22:3 ta enfatisa cu ta sabi pa “sconde” pa calamidad. Pesey nos mester ta alerta. Un bario cu normalmente ta trankil por cambia diripiente. Kisas mientras nos ta predica, nos ta nota diripiente cantidad di auto di polis of hende aglomera riba caya. Of kisas un doño di cas bondadoso ta spierta nos di un situacion tenso cu ta reina. En bes di keda bira bira pa haci coy caweta, lo ta mas sabi pa sali mesora for di e teritorio y bay traha un otro caminda.—Juan 8:59; 1 Tes. 4:11.
3. Con nos por aplica e principio na Eclesiastes 4:9 den nos sirbishi?
3 Evita di Traha Bo So: Eclesiastes 4:9 ta bisa: “Dos ta mihor cu un.” Kisas bo a custumbra di traha trankil bo so den teritorio, pero lo ta sabi pa haci esey ainda? Kisas den algun area ta safe pa traha bo so pero den otro area kisas no ta asina sabi pa un ruman muher of un hoben traha di cas pa cas su so; specialmente ora cuminsa bira un tiki scur. Experencia a mustra cu un compañero atento ta indispensabel. (Ecl. 4:10, 12) Keda pendiente di cada publicador cu tin den boso grupo. Avisa un hende dje grupo ora bo ta bay sali for di teritorio y hacie un custumber.
4. Con nos por contribui na e siguridad di tur nos rumannan?
4 Ancianonan ta ‘vigila nos alma’ y ta responsabel pa percura guia cu ta cuadra cu situacion di cada teritorio. (Heb. 13:17) Si nos ta humilde y ta coopera plenamente cu nan, nos por ta sigur cu Jehova lo bendiciona nos esfuersonan. (Mik. 6:8; 1 Cor. 10:12) Pues, laga tur sirbidor di Dios sigui duna un bon testimonio den e teritorionan, pero semper cu cautela.