Caha di Pregunta

◼ Kico nos mester tene cuenta cu ne si nos kier laga algun di nos propiedadnan of tur cos mes pa e organisacion di Jehova ora nos fayece?

Ora un hende muri, e no por dicidi mas kico ta pasa cu su cosnan material. (Ecl. 9:5, 6) Ta pesey hopi hende ta traha un testament of un documento legal cu ta splica con nan kier pa reparti nan posesion- of propiedadnan. (2 Rey. 20:1) Generalmente, nan ta skirbi den e documento aki tambe ken lo keda apunta pa ehecuta e testament of reparti e herencia. Den hopi pais, ora un hende fayece sin laga testament, ley ta indica con ta reparti su propiedadnan. Pesey, si nos tin un deseo specifico encuanto kico pa haci cu nos propiedadnan (por ehempel, si nos kier laga algun di nos cosnan of tur cos mes pa e organisacion di Jehova), ta importante pa nos traha un testament y scoge bon ken lo ehecuta nos testament.

E persona cu lo ehecuta e testament tin un responsabilidad serio. Dependiendo di e tamaño di e herencia, e trabou di reuni e propiedadnan y despues reparti nan por ta mara na tramitenan cu por tuma hopi tempo. Ademas, hopi biaha instancianan gubernamental ta stipula proceduranan cu mester sigui. En bista di esaki, nos lo no kier apunta cualkier miembro di e congregacion pa ehecuta nos testament. E persona cu nos scoge mester ta un persona capaz, confiabel y dispuesto pa cumpli cu nos deseonan.—Wak e articulo “E Beneficionan di Plania Bo Herencia”, den e ¡Despertad! di 8 di december 1998.

Si un Hende Pidi Bo pa Reparti Su Herencia: Prome cu tur cos, haci sigur di calcula e gasto y, hunto cu oracion, analisa si bo por cumpli cu e responsabilidad aki. (Luc. 14:28-32) Ora e persona fayece, abo tin e responsabilidad di notifica e beneficiarionan. Despues cu bo ricibi e autoridad necesario, lo bo tin e responsabilidad di reparti e herencia di acuerdo cu ley y precies manera e testament ta bisa. Un persona apunta pa ehecuta un testament mester ta consciente cu, sea e herencia ta grandi of chikito, e no por pasa por halto di loke tin para den e testament. Tur posesion y propiedad cu un persona laga pa un entidad huridico di Testigonan di Jehova ta fondo dedica na Dios cu ta pertenece na e organisacion di Jehova.—Luc. 16:10; 21:1-4.