Ki ‘Motibo Abo Tin pa Bo Ta Masha Contento’?
1. Na fin di luna, dicon nos tur mester ta masha contento?
1 Ora nos entrega nos rapport di sirbishi di veld na fin di luna, nos tur tin “motibo pa ta masha contento.” (Gal. 6:4) Sea cu nos ta pionero special y ta dedica 130 ora den sirbishi of nos ta publicador aproba pa raporta fraccionnan di 15 minuut, nos tur mester sinti nos masha contento di por rindi sirbishi na Jehova di henter nos alma.—Sal. 100:2.
2. Dicon nos tin cu duna Jehova lo mihor di nos mes?
2 Como e Señor Soberano di universo, Jehova merece pa nos dun’e lo mihor. (Mal. 1:6) Amor pa Jehova a motiva nos pa dedica nos bida pa haci su boluntad. Pues, si nos a duna lo mihor di nos tempo, habilidad y energia den e sirbishi di Jehova, na fin di dia of di luna nos cada un lo tin motibo pa ta masha contento. (Pro. 3:9) Sinembargo, si nos consenshi ta bisa nos cu nos por a duna mas, nos mester scuch’e y analisa con nos por mehora.—Rom. 2:15.
3. Dicon no ta sabi pa compara nos mes cu otro hende?
3 ‘Sin Compara Nos Mes cu Otro Hende’: Lo no ta sabi pa compara nos mes cu otro hende of cu nos mes tempo nos tabatin mas energia. Tene cuenta cu circunstancia ta cambia y cada ken tin su habilidadnan. Hopi bes, ora un hende ta compara su mes cu un otro, e ta haya gana di competi of e ta sinti cu e no ta bal nada. (Gal. 5:26; 6:4) En bes di compara hende cu otro, Hesus a elogia cada persona a base di loke e persona por a haci.—Mar. 14:6-9.
4. Ki les importante nos por siña for di e ilustracion di e talentonan?
4 Den Hesus su ilustracion di e talentonan, cada esclavo a haya talento “segun su capacidad.” (Mat. 25:15) Ora e doño a bolbe pa haci cuenta cu nan, el a elogia esnan cu a traha diligentemente segun nan habilidad y circunstancia. Anto el a bisa nan pa drenta y comparti su alegria. (Mat. 25:21, 23) Si nos tambe keda ocupa den e trabou di predica e Reino, nos por tin confianza cu nos lo ricibi e aprobacion di Dios y nos lo tin motibo pa ta masha contento.