“Duna Testimonio Cabal”
1. Ki bon ehempel apostel Pablo a pone den sirbishi?
1 “Cumpli cu bo sirbishi cabalmente.” (2 Tim. 4:5) Apostel Pablo por a duna Timoteo e conseho ey pasobra e mes tabata un bon ehempel. En realidad, entre aña 47 pa aña 56 di nos era, Pablo a haci tres biahe como misionero. Varios biaha e buki di Echonan ta menciona cu Pablo a duna “testimonio cabal.” (Echo. 23:11; 28:23) Con nos tambe por haci esey?
2. Con nos por duna testimonio cabal ora nos ta predica di cas pa cas?
2 Di Cas pa Cas: Pa nos por logra papia cu hende cu nunca sa ta na cas ora nos pasa pa papia di e bon noticia, nos lo tin cu bishita nan na un otro ora di dia. Por ehempel, pa nos haya e cabesnan di famia, kisas nos tin cu predica sea atardi of den weekend. Nos mester keda bay bek na casnan caminda nos no a haya hende te ora nos haya un hende pa papia cu ne. Pero kico si a pesar di tur bo esfuersonan bo no a logra haya hende na un cas? Un carta of yamada di telefon lo por duna bon resultado.
3. Ki oportunidad abo tin pa duna testimonio tanto publicamente como informalmente?
3 Publicamente y Informalmente: Sirbidornan di Jehova ta predica e berdadero sabiduria na ken cu kier scucha. Tin biaha esey ta sosode na ‘skina di caya’ of riba “plenchi” publico. (Prov. 1:20, 21) Ora nos ta haci nos cosnan di tur dia, nos ta corda duna testimonio? Nos por bisa cu nos ta ‘dedica nos mes completamente na predica e palabra di Dios’? (Echo. 18:5) Si ta asina, anto nos ta cumpliendo cu nos deber di “duna testimonio cabal.”—Echo. 10:42; 17:17; 20:20, 21, 24.
4. Con oracion y meditacion ta yuda nos duna testimonio cabal?
4 Pero por sosode cu pa motibo di timidez of falta di curashi, nos por keda sin duna testimonio. Nos por ta sigur cu Jehova ta compronde nos limitacionnan. (Sal. 103:14) Pero ora un situacion asina presenta, nos por pidi Jehova pa duna nos curashi. (Echo. 4:29, 31) Tambe nos por pone como meta ora nos ta haci nos estudio personal y ta medita riba e Palabra di Dios pa nos haya mas aprecio pa e bon noticia. (Flp. 3:8) Esey lo motiva nos pa predica e bon noticia cu entusiasmo.
5. Con nos por participa den cumplimento di e profecia di Joel?
5 E profecia di Joel ta bisa cu prome cu e dia grandi y temibel di Jehova bin, e pueblo di Dios lo sigui “marcha” padilanti y lo no laga nada stroba nan di predica. (Joel 2:2, 7-9) Laga nos haci tur loke nos por den e trabou di predica cu nunca mas lo ser ripiti.