“Stima Henter e Hermandad”

Casi dos mil aña pasa apostel Pedro a skirbi e palabranan inspira di e tema aki. (1 Ped. 2:17) Pero awe nos tin cu aplica nan mas cu nunca. Con nos por stima algo asina grandi manera un hermandad mundial? Y den e mundo sin amor aki, con nos por haci sigur cu nos amor no ta fria? (Mat. 24:12) Wak e DVD Henter Nos Hermandad (na Spaño, Toda nuestra asociación de hermanos) y purba di contesta e siguiente preguntanan.

(1) Na ki momento nos a bira oficialmente parti di nos hermandad cristian? (2) Menciona tres actividad cu henter nos hermandad ta participa aden. (3) Con nos rumannan ta mustra nan determinacion pa predica (a) den e partinan poco pobla di Alaska, (b) den e hafnan grandi di Europa y (c) den e selvanan di Peru? (4) Pakico nos no mester pensa cu e trabou di predica ta un trabou comun y coriente? (5) Duna ehempel di e maneranan cu Testigonan di Jehova a consola y apoya otro (a) despues di un temblor, (b) despues di un horcan y (c) durante guera civil? (6) Den ki maneranan practico nos tur por demostra cu nos tin e marca importante cu ta identifica nos hermandad cristian? (Juan 13:35) (7) Kico ta e beneficionan di traha hunto pa construi nos mes Salonnan di Reino? (8) Kico a yuda nos rumannan na Oost Europa y Rusia sobrevivi spiritualmente tempo cu e obra tabata prohibi? (9) Ki esfuerso extraordinario hopi Testigo ta haci pa asisti na congreso, y dicon? (10) Con e DVD aki a fortalece bo determinacion (a) pa rindi adoracion na Jehova hunto cu bo rumannan na reunionnan cristian, (b) pa yuda otro den tempo di necesidad y (c) pa predica fielmente ki ora cu bo por y na e manera cu bo por? (11) Con y ki ora nos por uza e DVD aki den sirbishi?

E motibo principal pakico nos ta parti di nos hermandad cristian ta e amor cu nos tin pa Jehova. Pues, nos gusta siña tocante dje y siña otro hende tocante dje. Y nos ta stima e hendenan cu Jehova ta stima. Ora nos yuda nan den tempo di necesidad, nos no ta spera pa Dios gradici nos. Mas bien, nos ta gradici Dios pasobra nos ta considera nos hermandad cristian como un regalo valioso di dje. Segun cu e ultimo dianan di e mundo sin amor aki ta yega na su fin, laga nos sigui demostra cu nos ta stima henter e hermandad.